قادین و ایش حیاتی
سوسن نواده رضی

ده‌ییشن اجتماعی قوروم و بو قورومون اؤزویله گتیردیگی قوشول‌لار، قادینی ایش حیاتیندا اشتراک ائتمه‌یه قورشالاییر. زورلاییر، یا دا مجبور بوراخیر دئمیرم؛ قورشالاییر، تشویق ائدیر، قامچیلاییر. حیاتین گئرچک‌لری، یاشامین چتین‌لیگی، سوروملولوق‌لار (مسئولیت‌لر)، أرلری‌نین طرفیندن ترک ائدیلیب تک‌باشینا قالماق احتمالی، مادی امکان‌سیزلیق‌لار، اؤزونو و سئودیکلرینی تأمین و تضمین ائتمک ایچ‌گودوسو (غریزه‌سی)، داها اولوملو و گوو‌نلی بیر یاشام سویه‌سی توتما ایسته‌گی، تک باشینا اؤز آیاق‌لاری اوزه‌رینده دورما آرزوسو، قادینی ایش حیاتی اوچون حرکته کئچیریر، و اونا اورک وئریر.
ایش حیاتی‌ ایله بیرلیکده اؤزونه داها چوخ گووه‌‌نن، حاق ائتدیی سایقی و ده‌یری گؤرمه‌یه باشلایان، داها دا چوخ سوروملولوق یوکلنه بیلمه گوجونو اؤزونده تاپان، اؤزونو داها راحات ایفاده ائده بیلن، حاقینی داها گوجلو ساوونا بیلن (مدافعه ائده بیلن) بیر قادین فیگورو چیخیر قارشیمیزا.
قادینین یئری‌نین اوشاق، مطبخ (آشپزخانا) و مرثیه‌لر اولدوغونو دوشونن‌لر، “قادینلاردان مودور اولا بیلمز چونکی اونلار دویغوسال و رومانتیک دیر و مودورلوق ایشلرینده باشاریلی اولماییب دوغرو قرار وئره‌ بیلمزلر” دئین‌لر، عاغیللی و ایستکلی قادین‌لارین حیات‌لاری‌نین هر نؤقطه‌سینه نئجه ده حؤکم ائدیب هر شئیی معین بیر انتظام و سیستئمده آپاردیق‌لارینی گوروب تعجب ائدیرلر بلکه ده، و حتی تعجب ائتمه‌لی دیرلر ده. چونکی؛ هم سحردن آخشاما قدر ایشده چالیشان، هم ائوی‌نین هر حالی ایله مشغول اولان، هم ده أری و اوشاق‌لاری ایله ایلگیله‌نن قادین، هم تعجب دوغوران، هم ده تقدیر ائدیله‌جک بیری دیر. بو قدر کاپاسیته‌نی، بو جور ذکا، انرژی و اؤزوئریلیگی (فداکارلیغی) و بئله چوخ‌طرفلی اولا بیلمه‌یی باشاران بیرینه؛ یالنیزجا اوشاق بؤیوتمه‌ و ائو تمیزلمه‌ رولونون بیچیلمه‌سی نه قدر اکسیک و یئترسیز اولدوغونو قانیتلاماغا(ثبوت ائتمه‌یه) کفایت دیر.
چالیشان آنالارین اوشاغینا یئتیشه بیلمه‌دیگی دوشونجه‌سی، اصلینده اوشاغینا یاخشی یئتیشه بیلمک اوچون چالیشماسی وارلیغی ایله چئلیشمکده دیر (تضاددا دیر). بلکه بعضی آراشدیرمالار، ایشله‌ین آنالارین، اوشاقلارینا یئتیشمکده یئترسیز اولدوغو سونوجونا چاتماقدادیر، آنجاق آنا داها وئریجی اولا بیلمک، مادی جهتدن اوشاغینا داها یاخشی بیر گله‌جک تأمین ائده بیلمک، اوخویوب چالیشیب اؤزونو گلیشدیررک اؤلادینا داها یاخشی بیر رول مودئل اولا بیلمک اوچون ایش حیاتینی داوام ائتمه‌یی داها عاغیللی‌جا بیلیر.
ایش حیاتی‌نین چتین‌لیگی، ایش ساعات‌لاری‌نین اوزون اولماسی، قادینین داها نظاملی و سیستئملی اولماسینی طلب ائدیر. حیاتینی پلانلی (برنامه‌لی) شکیلده یاشایاراق انتظاما سالان قادین، بلکه بیر آز داها چوخ ییپرانیر (فرسوده اولور)، لاکین اوشاق دا دوغوب بویودور، کاریئر صاحبی ده اولور. بئله‌جه یاشاییشینی چوخ داها آنلاملی و قاپساملی کیفیته یوکسلتمه‌‌یی باشاریر.
ایشله‌ین قادین‌لارین اوشاق‌لاری ایله ایلگیلنه‌جک واخت تاپا بیلمه‌دیگینی دوشونن‌لر؛ ائو ایش‌لری ایله یاناشی، دائم قوناق چاغیران، کئک- خؤرک پیشیرن، داواملی تمیزلیک‌له، توز سیلیب سلقه- سهمانلا واخت کئچیرمک مجبوریتینده قالان ائو خانیم‌لاری‌نین اوشاق‌لاری ایله لازیم اولدوغو کیمی‌ایلگیلنه بیلدیکلرینی می‌دوشونورلر گؤره‌سن؟
ییغوالاردا واخت کئچیرن‌لر، قونشولارلا ساعاتلار اوتوروب فایداسیزجا بوش بوغازلیق ائدیب دردلشن‌لر، آنا- باجی، دوست – آشنایلا ساعتلرجه تلفوندا باغلانانلار ، بازارلاردا ده‌یرلی واختی ده‌یرسیزجه خرجله‌ینلر، اوشاغی چوخ یاخشی تانییب داها چوخ آنلایا بیلرمی‌ظنیزجه؟
کرامت ائو خانیمی‌اولماق‌دیرسا، بوتون اوشاقلی قادین‌لاری ایشدن چیخاریب اوتوروب باخاق اوشاق‌لارین بؤیومه‌سینه. بو شکیلده گؤزل نسیل‌لر یئتیشدیره بیله‌ریک می‌گؤره‌سن؟
یوخسا، آنالارا اوشاق‌لاری ایله نئجه بارلی- بهره‌لی واخت کئچیره بیلدیک‌لرینی، اؤلادلار‌ینین سئوگی‌ دیلی‌نین نه اولدوغونو، آنادان گؤزله‌نن‌لری‌هاردا و نئجه داورانمالاری لازیم اولدوغونون شعورونو وئره‌رک می‌اؤلادلاریمیزین گله‌جه‌یینی قورتارا بیله‌ریک؟
یاخشی بیر اؤولاد یئتیشدیرمک اوچون ائو خانیمی، یا دا ایشله‌ین اولماغینیز ائله چوخ بیر شئی ده‌ییشدیرمز. اؤنملی اولان اوشاغی‌یلا نئجه انسیّت و باغلانتی قوراجاغینی بیلن، اونو آنلاماغا و تانیماغا چالیشان شعورلو و اؤزوئریلی آتا- آنا اولا بیلمک اوچون جان آتیب چابا گوسترمک، بونون اوچون أمک وئرمک دیر.