سمیر کهیه اوغلونون «منیم بیر آغ آتیم وار..» شعرینین یورومو
افراسیاب نوراللهی
بیزیم مملکتده
قیزلارین ساچلارینا
رؤزﮔار ده‌یمه‌سین یاساقدیر
گونش ایشیلداماسین تیللرینه _ دئمیشلر
بیزیم شهرده ، شعر ترسینه اوخونورسا
اوردو (انجمن )شعر صحنه‌سینده آلقیشلانماسى یاساقدیر
بیزیم تورکمان الف باء هجه‌سینده
بعض کلیمه‌لره کلبچه وورارلار
آزادلیغى ایسته‌ینلره یاساقدیر_ دئمیشلر
بیزیم کؤچه‌لرده
تؤى شئنلیک ﮔونلرى اوزوموزه
بویاق سورتمک هر هانکى بیر رنگى ممنوع ائتدیلر
رومانتیک ماهنیلارى
سویله‌مک و دینله‌مک یاساقدیر_دئمیشلر
کوینه‌یمیزین دیزدن آلتا قیسسالیغى اینقلاب ائد‌ر، بیزیم شهرده
بیزیم شعر آخشاملاریندا
گوزلریم گوزلرینده دوداقلاریم دوداقلاریندا دانیشارساق
تبریزین ساعات قاباغى آلتیندا
فکریمیزه او دوشونجه‌یى پایلاشارساق
ائل‌گولى باغچاسیندا
زور بیر تعبیر دئنیلر، یا!!
شعرله دانیشارساق ، بعضا کفر دئنیلیر بعضاده اعداما اولاشیر!!
بئینیمیزده کى زمانا
هایقریشلارمیز کوچه به کؤچه
سوقاق سوقاق
شهر شهر دولاندیریر
یاساق شعرلریمیزى ایپتن آسارلار..
شعریمیزده بوغولان
کسیلن باشیمیزى دفن ایتمک‌چین
ایپین پاره‌سین ایسترلر بیزدن..
بیر اؤوج توپراغا
بیر قدح قان ایسترلر
بونى بیر بویوک جنایت و تهمت داشییرلار بیزه
منیم نسیمى چاغیم گئتدى _هى هوار
منیم شهریار واختیم بیتدى _هى هوار
منیم ساده‌جه بیر آغ آتیم قالدى
کربلاء صحراسیندا دولاشیر بارماقلارى اؤسته
حسینى بن على‌نین باشى اؤسته
ملائکه‌لر یاس توتموشلار..
بیلیرمیسنیز..!!؟
نبى داود مقتل عاشؤرایى اوخور قیامت ﮔؤنونده بوندان خبرنیز وارمى عجبا..!!؟
فرق ایتمز بئله
هوشنک جعفرى‌نین آغ آتیندان
او بیاز بیر آتلى شاعر
من سوسوز بیر فراتلى …؟؟
او ﮔونشین ﮔؤزونه شعر یازار
من شعر دئسم
شعر توربه‌مى قازار..
حایاتمیز یاساق اولدو..
حسابمیز قیامته قالدى..
شعریمیز یاریم قالدى _هى هوار فلگ..!!
دیلیمیز آه..دیلیمیز
یا.. اؤلدورور
یا.. یاشادیر بیزى آزادلیغا دوغرو..!
“عراق سؤزو، ندنسه، همیشه فراق سؤزونو منیم یادیما سالیر. فراق سؤزو ایسه فضولینین نامعلوم رسام طرفیندن چکیلمیش مشهور شکلینی گؤزلریمین قارشیسیندا جانلاندیریر. اونون کدر دولو گؤزلری، اخیشلارینداکی ایضاح ائدیلمز حسرت، اینتیظار بؤیوک نغمه‌کارین قوربت اودو ایله یانمیش قلبیندن نه‌لر سؤیله‌ییر!” رسول رضا
یانیلماسام رسول رضا ۴۶_۱۹۴۵ نجی ایللرینده بختیار واهابزاده ایله بیرگه، عراق تورکمان ائللرینه سفری اولوب. اونون اوردان دؤندوکدن سونرا “اوزاق ائللرین یاخین تحفه‌لری” مقاله‌سینین باشلانیشیندا گئدن بو سؤزلر و فضولینین گوزلرینه یازیلمیش ایضاح ائدیلمز حسرت و انتظار، بؤیوک نغمه‌کارین قوربت اودیلا یانمیش قلبیندن نلر سویله‌ییر؟!
اوستوندن یئتمیش ایله یاخین بیر زامان کئچسه‌ده، سمیر بی‌ین گؤزلرینده و سؤزلرینده او (نه لر) بیر داحا اؤز عکس‌صداسینی تاپیر و سمیر بی او (نه لر) ی یازمیش شعرینده و او (نه لر) ی چیزمیش و اوبرازلاشدیرمیشدیر شعرینده..
بو مقدمه‌دن سونرا سمیر بی‌یین شعرینده ایکی جهتی اوزه‌للیکله بلیرتمک ایستیرم:
۱) شعرده “احساس” اورونو
۲) شعرده اوزچولوک
شعرده “احساس” اورونو:
شعرده بئله بیر دئییم وار؛ “یامان احساسلی شعردی” -دئیرلر. شعری اولوشدوران عنصرلردن بیریسی ده “احساس”دی. باخسانیز سمیر بی‌یین یازی دیلینده ده او احساس قونوسو قاباریقدی.. ندنلرینه دؤنرسک، بو احساسی سیز افغان و کورد شاعیرلرینده ده گؤره بیلرسیز. اودا اونلارین زامان زامان ازیلدییندن و اوزولدویوندن خبر وئریر. بو حسابلا سمیر بی‌یین بو شعری، بو دئییمین نمونه‌وی تصدیقیدیر.
شعرده اوزچولوگ:
سمیر بی‌یین بو شعرینی اوخویونجا، سمیر بی‌یی تانیماساقدا بئله اونون عراق تورکمان ائللرینه عاید اولدوغونو گونش کیمی گؤرمک اولور. او اوز ائلینی، اوز اوباسینی، اوز تاریخینی، ایقلیمینی و اؤز وارلیغینی، اؤز کئچمیشینی و ایندیسینی چووخ صمیمی بیر اورکله ترنم ائدیر.. شعر تپه‌دن دیرناغا اوزچولوک ترنمی، اوزچولوک زومزومه‌سیدیر.. بو شعری اوخورکن، سون واختلار ایشله‌دییم “قلوباللاشما، بیز و ادبیاتیمیز” آدلی مقاله‌م دوشدو یادیما..اورادا یازا بیلمه‌دییم بیر اوبراز واردی.. همشه بو قلوباللاشمایی دوشوننده، بیر دیرمه ماسانی تصور ائله‌میشم: اورادا دونیا میللت‌لریندن شاعیرلر واردی. بیر آرایا گلیبلر و هره‌سی ده اؤز شعر پایلاریلا.. هر کس سیرایلا گلیر اؤزونو افاده ائدیر و کئچیر..او دیرمه ماسانی دوشونونجه، سمیر بی‌یی اورادا گؤرمک اولور، آما بیزیم چوخ سایلی اوزوموزدن ده اولموش اؤزگه‌دن اولموش گنجلییمیزی دوشوننده، دوغروسو اورادا اؤزوموزه بیر یئر گورمورن..
بو شعرده منیم ایلگیمی چکن باشقا جهت، سمیر بی‌یین اوزونو بؤیوک وطنه، آذربایجانا، معنوی پایتختی تبریزه، نسیمی‌یه، شهریارا و هوشنگ جعفری‌یه باغلاماسیدیر. بو بیر داحا داهی فضولینین یولونون تصدیقی و داوامیدیر..
“او بیاز بیر آتلى شاعر
من صوسوز بیر فراتلى …….؟؟
او ﮔونشین ﮔؤزونه شعر یازار
من شعر دیسه‌م
شعر توربه‌مى قازار..
حایاتمیز یاساق اولدو..
حسابمیز قیامته قالدى..
شعریمیز یاریم قالدى _هى هوار فلگ..!!
دیلیمیز آه دیلیمیز
یا اؤلدورور
یا یاشادیر بیزى آزادلیغا دوغرو..!!
