چئویرن: مرتضی مجدفر
ترجمه: مرتضی مجدفر
مرتضی مجدفر

اوتوزلار
مرتضی مجدفر

۱۳۹۱ نجی ایلین اردیبهشت آیی‌نین اوتوزوندا، تهرانداکی اندیشه مدنیت ائوینده، صابر ادبی انجمنی‌نین، موسیقی و شعر آخشامی کئچیریلدی. بو ییغینجاقدا، بیر چوخ یازیچی، شاعیر و ادیب‌لریمیز چیخیش ائتدیلر. چیخیش ائدنلردن بیری ده، دکتر مرتضی مجدفر اولموشدور. اونون قیسا دانیشیغینی، هم ‌ده آتاسی غلامرضا مجدفردن اوخودوغو شعرینی بورا‌دا گتیریریک.

***

بو گون ۱۳۹۱- نجی ایلین اردیبهشت آیی‌نین اوتوزو دور. من بو گون نه حئکایه اوخویاجاغام، نه ده مقاله. من بو گون سحرچاغی‌لار رادیودا آپاریلان «تقویم تاریخ» برنامه‌سی کیمی، بیر نئچه تاریخین تقویمین واراقلایا‌جاغام. جالیب بو کی بورادا اشاره ائتدیگیم بوتون حادثه‌لر، اردیبهشت آیی‌نین اوتوزو ایله ارتباط‌دا دیرلار.

× کئچن ایل اردیبهشتین  اوتوزوندا، قیرمیزی سئوگی (عشق سرخ) آدلی حئکایه مجموعه‌مین حاضیرلاما ایشلری قورتاریقدان سونرا، اونو ارشادا یوللادیق، بو کیتابا منیم دوققوز تورکجه حئکایه‌م، فارسجا ترجمه‌لری ایله برابر، داخیل ائدیلمیشدیر. بو حئکایه‌لرین هامیسی، تبریزین تراکتور فوتبال تیمی‌نین هوادارلاری‌نین حیاتی اساسیندا یازیلمیشدیر. ایندییه کیمی« بو کیتابین چاپ اوچون اجازه‌سی واردیر یا یوخ؟» حاقیندا، هئچ ‌نه ائشیتمه‌میشیک.

× بو گون اردیبهشت آیی‌نین اوتوزوندا، ایکی تورکجه اوشاق شعر کیتابی‌نین حاضیرلاما ایشلرینی سونا چاتدیردیق و یاخین گونلرده ارشادا یوللایاجاغیق. کیتابلارین بیری، بؤیوک اوستادیمیز«حبیب فرشباف» ین «اوشاق نغمه‌لری» آدلی شعر کیتابی‌دیر. بو کیتابا حبیب معلمین ۱۵ اوشاق شعری داخیل ائدیلمیشدیر. کیتابی، اوستادین صنعتکار قیزی، وقار فرشباف  خانیمین گؤزل تصویرلری داها دا گؤزللشدیرمیشدی. هم ده کیتابا، اوشاق باغچالاریندا، آموزش‌و‌پرورش اوصوللاری ایله استفاده ائتمک اوچون، من بیر مقدمه حاضیرلامیشام.کیتابین آخر صحیفه‌لرینده ایسه، اوچ صحیفه‌لیک سؤزلوک وئریلمیشدیر. کیتابی تهرانداکی پیشگامان پژوهش‌مدار انتشاراتی‌نین اوشاق بؤلومو چاپا حاضیرلایب و بوتون صحیفه‌لری رنگلی و گلاسه کاغیذی اوستونده چاپ اولاجاقدیر. بو کیتابدان باشقا، منیم«باخ گؤر کیم دیر؟ نه‌چی دیر؟»آدلی اوشاق شعرلریمی اوستاد فرشبافین کیتابی کیمی‌‌، مستقل بیر اثرده چاپا حاضیرلامیشیق. بو کیتابا منیم یئددی شعریم داخیل اولموشدور. بو یئددی شعرده من، اوشاقلارا  یئددی ایشی تانیتدیریرام. کیتابین فرعی عنوانی «ایش‌لر و اوشاق‌لار» دیر. کیتابین شکیلی‌لرینی آذربایجانلی گنج صنعتکار« سام سلماسی‌» چکیب و بونو دا تهرانداکی پیشگامان پژوهش‌مدار انتشاراتی‌نین اوشاق بؤلومو چاپ ائتمکده‌دیر. بئله ظن ائدیریک کی بو ایکی کیتابین چاپ اولماسی ایله، اوشاق ادبیاتیمیز، خصوصیله شعرده، یئنی بیر جیغیر آچیلاجاقدیر. کیتابلارین حاضیرلانماسی بیزیم الیمیزده، چاپ اولوب اوشاقلاریمیزین الینه چاتماسی ایسه، ارشاددا اولان، آللاهیمیزین بنده‌لری‌نین الینده دیر.

× بو گون اردیبهشت آیی‌نین اوتوزو، ۳۰ آذر ۹۰- دان دوز بئش آی کئچیر. آذرین اوتوزوندا آتام مرحوم «غلامرضا‌مجدفر»ین «آلتمیش‌لار، یئتمیشلر» آدلی شعر مجموعه‌سی حاضیرلانیب، اجازه ‌سیناغینا یوللانیلمیشدی، آنجاق…

اوتوزلار قورخوسوندان قورتارماق اوچون، نه یاخشی کی همین کیتابدا درج اولان بیر شعرله سؤزومه سون قویوم. آمما جالیب بو کی انتخاب ائتدیگیم شعر ده، اردیبهشت آیی‌نین اوتوو ایله باغلی دیر. آتام بو شعری ۱۳۶۹- نجی ایلین اردیبهشت آیی‌نین ۳۰-‌‌ وندا سؤیله‌میشدیر.

اودلاندی خلقیمیز

 حسرتدی خوش یاشاییشا چوخداندی خلقیمیز

آی قونشولار هرایه گلین، یاندی خلقیمیز

مین تیر اتهامه دوچار اولدو ظلم‌ایلن

تکجه گناهی، آنلاغی دیر، قاندی خلقیمیز

تهمت‌لری کی ووردولار چوخ ناروا اونا

انکاره گلدی، تور‌کلویونو داندی خلقیمیز

بیر رنگ و ساده دیر، هامینی باسدی باغرینا

چوخ ساده، خصمی دوست اؤزونه ساندی خلقیمیز

هر نهضتی کی قاوزانیب ایراندا، باشدادیر

مشروطه نهضتینده چوخ آدلاندی خلقیمیز

هر بیر زامان بو تورپاغی تهدید ائده خطر

بیر باوفا سیلاحلی، نگهباندی خلقیمیز

آنجاق وای اوندادیر دورا ظلمون علیهینه

وِردی، سرودو، ایده‌سی قان- قاندی خلقیمیز

لاکین سیلاح آلاندا اَله چوخ وقاریلن

انصافی واردی، قورخما مسلماندی خلقیمیز

شمشیر الینده مالک اشتردی جنگده

ایماندا لاپ ابوذر و سلماندی خلقیمیز

سعی ائت داشیتما حؤوصله‌سین، چوخ صبوردور

صبری داشاندا، طالب عصیاندی خلقیمیز

یوغ آلتینا کئچن دئییل بوینو بو میللتین

مشگلدی، فیکره گلمه‌سین آساندی خلقیمیز

خلقین غمیله غملی‌دیر، شادلیقدا شادمان

ائل شادلیغیندا خرم و خنداندی خلقیمیز

تبعیض ایچینده ایللریله دؤزدو، دینمه‌دی

جوز و ستم اودوندا آلوولاندی خلقیمیز.

چاپ

2 پاسخ

  1. شبنم خانیم. سیزین یوکسک لیسانسینیزین موضوسو بیز آذربایجانلیلارا چوخ فایدالی اولاجاقدیر. نه یاخشی کی ایشلرینیز قاباغا گئتدیکجه ایشیق سایتیندا بو حاقدا یازیلارینیز اولسون. سیزه باشاریلار آرزیلاییرام.

  2. اوتوزلار گلیر گئدیر… یازیلار یازیلیر…چاپ اولان اولور…اولمایان نوبه ده اوتورور… اما مهم بودی: اوخوماقلار دایانمیه…
    اوخویاق اوخویاق اوخویاق…
    چوخ مسرورام که سیزین «باخ گؤر کیم دیر؟ نه‌چی دیر؟» اوشاف اوچون یازیلان شعرلریزی که منیم ارشد تزیمله ده ارتباط دادی چاپ اولمامیشدان قاباق اوز دست خطیزینن اوخوماقا افتخار تاپمیشام

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

اوتوزلار

مرتضی مجدفر
www.ishiq.net

آذربایجان ادبیات و اینجه‌صنعت سایتی

اوتوزلار

مرتضی مجدفر
www.ishiq.net

آذربایجان ادبیات و اینجه‌صنعت سایتی

اوتوزلار

مرتضی مجدفر
www.ishiq.net

آذربایجان ادبیات و اینجه‌صنعت سایتی