ائلین اونودولماز عاشیقی، عاشیق درویش
حسین واحدی

 توز باسیب ائشیتمیر صدفلی سازین
گلمیر قولاغیما او خوش آوازین
قاریشدی تورپاغا صؤحبتین سؤزون
یانیرام سنده كی كامالا درویش

اورمیه‌نین آدلیملاری كیتابیندان رحمتلیك عاشیق «درویش»-‌ین یاشامینی اوخویوب قورتولاندان سونرا اوره‌ییمی‌غم باسیب اوره‌كدن آه چكدیم. ندن بئلنچی بیر اینسانلاریمیز اونودولوبلار؟!! بونا گؤره ماراقلاندیم عاشیقین كندینه گئدیب، قبرینی زیارت ائدم. یولداشلاریمین بیریله بو قونویو آرایا قویوب اونون كندینه گئتمه‌یی قرارا گتیردیك.

قراریمیز جومه گونونه‌ایدی و زامانین اوچدوغونا گؤره بو گون تئزلیكله گلیب چاتدی، گون اورتادان سونرا «كوردلر» كندینه ساری یوللاندیق. كند اورمیه‌نین چیچست یولونون 5 كیلومترلییینده‌ایدی. كنده یئتیشیب، اورادا یاشایانلاردان قبیرسانلیغین یولونو سوروشدوق. نئچه دقیقه‌دن سونرا كنددن آزجا ائشیكده اولان قبیرسانلیغا یئتیشدیق. تورپاقلی بیر یول و سسسیز بیر آخیرت ائولری.. آخیرته قاووشانلارا بیر فاتیحه وئرندن سونرا، تله‌سه‌رك تئز قبیرلری بیر- بیر آختاریب یازیلارینا دقت ائدیردیك، آما رحمتلیك درویش-ین قبیرینی تاپا بیلمه‌دیك. اورالاردان كئچن بیر چوباندان عاشیقین قبیرینی سوروشدوق و كاشكی سوروشماسایدیق!چوبان او كندین یاشایانلاریندان اولاراق عاشیقین قبیرینی تانیمیردی!!

نئیله‌مك دئمه عاشیق ائله اؤز كندینده‌ده غریب‌ایمیش. گؤی‌ده بو غریبلییه دؤزه بیلمه‌ییردی و آغلاماق ایسته‌ییردی.. اومودلریمیزی پوزمایاراق، بیرینین یولدان كئچمه‌سینی گؤزله‌ییردیك. او آندا بیر پیكان قبیرسانلیغا ساری گلدی. دئمه تانری یئتیردی! بیزیم یانیمیزا یئتیشنده اوندان عاشیقین قبیرینی سوروشدوق و شوكورلر اولسون سوروجو قبیری تانییرمیش و اونو بیزه گؤسته ره رك اؤزوده بیزیمله قبیرین یانینا گلدی، اللی یاشیندا اولان او معرفتلی بی بیزه حؤرمتله یاناشیب، عاشیقا فاتیحه گؤندرندن سونرا آزجا اونون یاشامینی بیزیم اوچون آچیقلادی و سورولاریما جاواب وئردی.

رحمتلیك عاشیق درویشین قیساجا یاشامیندان بئله دئمك اولار:

عاشیق درویش فرهاد اوغلو 1309 – نجو گونش (شمسی) ایلینده اورمیه‌نین «كوردلر» كندینده دونیایا گؤز آچمیشدیر. او ده‌یرلی اوستاد عاشیق فرهاد كیمی‌آذربایجانین سنتی موسیقی‌سینین آدلیملاریندان ساییلیر. عاشیق درویشین گؤزل، ایستی و صمیمی‌سسینه گؤره عاشیق فرهادین شاگیردی اولموشدور. درویش چالان ساز سسی جانلارا كئچیب و گؤزل سسیله اونودولموش  اثرلره جان باغیشلاییردی. بو اونودولماز اوستاد 1372 ـ نجی ایلین قویروق دوغان(مورداد) آیینین دوققوزوندا، گؤزلرین دونیایا یوموب، اؤز دوغوم یئری اولان «كوردلر» كندینده تورپاغا تاپشیریلدی. عاشیقین تشییع جنازه‌سینده ایینه سالماغا یئر یوخویموش و بو اونون خالق ایچینده نه قده‌ر سئویملی اولدوغونو گؤستریردی.

عاشیق درویش یاشام بویو (همیشه‌لیك) آذربایجانین سنتی موسیقی‌سینی سئورلرین اوره‌یینده قالاجاقدیر و بو سس اورمیه اوچون قالارگی بیر سس اولوبدور. رحمتلیك درویش ایرانین بوتون میللی موسیقی فئستیواللارینا قاتیلب و یوكسك یئرلره ال تاپیب، اؤدول لر قازانیب‌دیر. او نئچه ایللرده اورمیه رادیو، تلویزیونویلادا ایش بیرلیگی آپاریبدیر. او ده‌یرلی اوستاد چوخلو شاگیردلرده موسیقی دونیامیزا تربیه ائدیبدیر. اونلاردان، عاشیق اسمعلی (اورمیه – اونون بیرینجی شاگیردی)، عاشیق صبور شریفی (اورمیه)، عاشیق عبدالله اشرفی (قورد تپه)، عاشیق ذكریا ملكی(قولونجو)، عاشیق رضا پوینده (سولدوز) و …آد آپارماق اولار.

عاشیق درویش، متین، ویقارلی و عاریف بیر كیشی ایدی، دئمك اولار او خصلت ایله صنعت ده، اصیل و نمونه بیر عاشیق و اوزان‌دیر. رحمتلیك درویش عاشیق صنعتینده اؤزونه مخصوص اولان نئچه‌هاوا یادیگار قویوب. اونلاردان «شكر یازی‌هاواسی» و «غربتی‌هاواسی»- نی آد آپارماق اولار. بو‌هاوالار ایندیده اورمو عاشیقلارینین آراسیندا چالینماقدادیر.

سونوندا دئمه‌لییم بئلنچی اینسانلاریمیزا سایغی گؤسترملی‌ییك و اونون شانینده اولان بیر مزارلیق تیكیب، هئچ اولماسا آدینا بیر خییاوان یارادیب، هئیكلین پاركلارا قویمالییق.