zihagh
«فریدون حاصارلی‌»دان خاطیره‌لریم
علیرضا ذیحق
hasarli

سایریشان اولدوزلارین بیر – بیر آخماسی، کؤنول‌لری کدره بوغسادا اونلارین سؤنمز ایشیغیینی هئچ ده دانماق اولماز. اونلار گله‌جه‌یین‌هادی‌سی و گؤزلریمیزین نورو اولاراق ایل‌لره مئیدان اوخویوب، یاشار ایده‌آل‌لارا ایز آچیرلار. فریدون حاصارلی‌دا بیر شاعیر اولاراق یانیقلی کؤنلو ایله ائل- اوبانین صادیق نغمه‌کاری اولوب، حیاتی بویونجا دیلیمیزی، دردیمیزی و سایسیز نیسگیل‌لریمیزی قلمه آلیب، جانی ایله و روحو ایله چوخلو میصراع‌لارین یارادیجیسی اولوبدی.
فریدون حاصارلی‌نی ایلک گؤردویومده ۱۳۵۹– نجو ایل ایدی. جمعه آخشاملاری تبریزین تربیت کیتابخاناسیندا یحیی شیدانین باشچیلیغی ایله شاعیرلر مجلیسی قورولوردو. من او زامان‌لار «حسین فیض‌اللهی‌وحید» و «سلیمان ثالت» ایله یئنیجه تانیشسام دا، خوی‌دان تبریزه گلدیییم اوچون جمعه آخشاملاری هتل عوضی اونلارین قوناغی اولاردیم. هفته ده بیر گئجه او عزیزلرین ائوینده اولارکن باشقا شاعیرلرله ده تانیشلیغیم اولاردی. «عباس بارز»، «ائل اوغلو ( صدیار وظیفه )»، «بهرام ائلچین»، «اصغر فردی»، «حمید احمد زاده (تئلیم خانلی)»، «ستار گول محمدی» و آیری – آیری شاعیرلری ده ائله بو قوناقلیق‌لاردا تانیدیم. آمما فریدون حاصارلی‌نی اؤنجه شاعیرلر مجلسینده تانی‌ییب سونرا حسین فیض الهی وحید گیل ده آرتیقراق اونون حیاتی و یارادیجیلیقی ایله تانیش اولدوم. او محزون باخیشی، مهربان سسی، اونودولماز شعرلری و اوجا بویو ایله خاطیریمده قالارکن، ایللربویو اونو گؤرمه‌سم ده ۳۳ ایل سونرا «رضا همراز»ین آتاسی‌نین یاسیندا اونو گؤررکن یئنه بیر- بیریمیزی تانی‌ییب قوجاقلاشدیق. سون گؤروشوموز چوخ آز بیر لحظه‌لر دوام ائتسه‌ده، زمانه‌نین توزو و آجی‌لاری اونون سیماسیندان بللی ایدی. نئجه کی من ده داها او گنج‌لیییمی‌ایتیریب ۵۵ یاشینا گلمیشدیم.
فریدون حاصارلی دان ائشیتدیییم ایلک شعری هئچ واخت یاددان چیخارتمامیشام. اونون «آذربایجانلی اوشاق بیرینجی کیلاسدا» آدلی شعری، او قده‌ر درین دویغولارا مالیک ایدی کی ایستر ایسته‌مز بیر معلم اولارکن گؤز یاشلاریمی‌آخیتمیشدی و بیزیم نییه بئله بیر قارا طالع یاشادیغیمیز منی سیخینتی‌لار ایچره بوراخمیشدی. سونرالار بو شعر تبریزده یایینلانان «ده ده قورقود» درگیسی‌نین ۳- نجو ساییسندا درج اولماقلا (۳۰/۷/۵۹)، آذربایجان شعرینده یئنی بیر اولدوزون دوغولماسی گؤز اؤنونه چیخدی. فریدون حاصارلی بئله‌لیکله ده ده قورقود درگیسی‌نین امکداشلارینا چئوریلدی و حتتا بو درگی‌نین هر آی دوز واختیندا یاییلماسی اوچون مادّی یاردیم‌لارینی دا اسیرگه‌مه‌دی.
فریدون حاصارلی نین ده ده قورقود قازئتینده چوخلو شعرلری چاپ اولسادا “کارگر قدرتی” و “گئت عموسام” شعرلری داها آرتیق آلقیش قازاندی و شعر میراثیمیزین قیزیل صحیفه‌لرینده همیشه‌لیک بیر دَه‌یر صاحیبی اولدو.
فریدون حاصارلی‌دان سؤز آچدیقدا اونون سئویملی قلم صاحیبی اولان اوغلو «رضا »‌نی دا اونوتماق اولماز. اونو هرزامان گؤررکن اوغلو رضا دا یانیندایدی. رضا یازی دا و شعر ده «اورمان» تخلص ائدیردی و اونون اثرلری ده “ده ده قورقود ” قازئتینده آردیجیل اولاراق درج اولونوردی. دئمک کی ده ده قورقود درگیسی حسین فیض‌الهی‌وحیدین امه‌یی‌له چیخارکن، من ده باشاردیقجا اونا یاردیم ائده‌ردیم.
ایندی او ایللردن چوخلو آی گون گئچسه ده، فریدونی ایتیرمیشیک، آمما اونون عطیرلی و خاطیره‌لی رایحه‌سی، همیشه بیزیمله‌دیر. اونون شعرلری کیتاب شکلینده چیخارکن، آذربایجان ادبیات سماسیندا پارلایاجاقدیر و اؤز نورونو، گله‌جک نسیل‌لره یاغدیراراق اونون شاعیر سهنده یازدیغی بو شعری خاطیرلاداجاقدیر:
ده‌ده قورقودومون خلف اوغلونو
یادیندان چیخارتماز هئچ زامان ائل‌لر
گزه‌جک دیللرده سازیمین سؤزو
ترنم ائده‌جک سازداکی تئللر

سهندیم ابدی باقی قالاجاق
دونیالار دوردوقجا اوره‌ییمیزده
هامی‌اوره‌کلرده مسکن سالاجاق
قول- قاناد آچاجاق دیله‌ییمیز ده…