چئویرن: ایشیق
ترجمه: ایشیق
ایشیق

چوخ تاسفله، تانینمیش آذربایجان شاعری رضا اسلام طلب اکبری(رضا ایتگین) چرشنبه گونونون سون آنلاری آذر آیی‌نین ۲۳ینده تبریز شهرینده دونیادان گؤز یومدو.

رضا ایتگین ۱۳۱۶ینجی گونش ایلینده یوخسول و زحمتکش بیر عائله‌ده تبریز شهرینین گامیش‌آوا محله‌سینده دونیایا گؤز آچدی. معیشت آغیرلیغی اونا مستمر تحصیل آلماق امکانی وئرمه‌دی و رضانین یئنی‌یئتمه‌لیک ایللری فرش دزگاهلاری‌نین دالیندا و توخوجولوقلا کئچدی. سونرالار گنج رضا اؤز معیشتینی تاکسی سوروجولوگی‌ایله تامین ائتمکه چالیشدی و ایللر بویو تبریز شهرینده تاکسی سوروجوسو صفتیله چالیشدی. انقلابدان سونرا او پئشه‌سینی دییشیب و باشماقچیلیقلا مشغول اولدو. بو پئشه‌ده رضا ایتگین سون ایللره‌دک چالیشدی و بیر آن‌دا اولسون منسوب اولدوغو زحمتکش صینفی‌نین آرزو – ایستک‌لرینی و پرابلئملرینی اونوتمادی.

رضا ایتگین هله گنج‌ایکن آذربایجان ادبیاتینا خصوصیله شعرینه ماراق گؤستردی. شعرلری مضمون اعتباریله انسان‌سئورلیک و بشری ایده‌آللاریلا دولغون و فورم آعتباریله آذربایجان شعرینین دوغما وزنی- هجا وزنینده و کلاسیک عروض وزنینده اولموشدور. انقلابین ایلک ایللرینده او تبریز ادبی انجومنلرینین فعال عضوی کیمی چیخیش ائدیردی. اثرلرینین بیر چوخو دؤرو مطبوعات خصوصیله استاد شیدانین تشبثوایله تبریز شهرینده نشر اولان “فروغ آزادی” روزنامه‌سی‌نین آذری صحیفه‌سینده یاییلیردی.

رضا ایتگین عؤمرو بویو چوخ صمیمی، انسان‌سئور، دوستلاری آراسیندا بؤیوک احتراما مالک، تبریز باشماقچی بازاریندا باشماقچیلار آراسیندا حؤرمتلی بیر شخصیت و آذربایجانین زحمتکش شاعری کیمی یازدی؛ یاراتدی و یاشادی. شبهه‌سیز اونون شرفلی خاطره‌سینی ادبی اجتماعیاتیمیز، تبریز زحمتکشلری و یاشادیغی محله ساکنلری هئچ واخت اونوتمایاجاقدیر.

بیز‌ده اؤز نؤوبه‌میزده، آذربایجانین سئویملی شاعری “رضا ایتگین”نین آغیر ایتگیسینی شاعریمیزین محترم عائله‌سینه، دوست تانیشلارینا، ادبی اجتماعیاتیمیزا و عمومیتله آذربایجان خالقینا باش ساغلیغی وئریریک و شرفلی خاطره‌سینی عزیزله‌ییریک.

چاپ

6 پاسخ

  1. سلام ائلیرم سیزین کیمین عزیزلره
    تبریزین بو بؤیوگ شاعری، منیم عزیز و گرامی بؤیوک بابام ایدی کی ایندی ده شاعرین عزیز احترامینا آدیمی که «سحر»دی و بو افتخار یارادان شاعر اؤزوندن یادگار قویموش، چوخ افتخار ائلیرم و آرزیم بودور کی بو بؤیوک شاعرین آدی و سانی دائم یادلاردا قالسین. بویون ده چوخ درین حزن ایله عزیز و احتراملی بؤیوک بابامین اونومینجی ایل دؤنومون تسلیت دئییرم.

  2. ایفتخاریمدیر کی ائلیمیزین بیر بئله بویوک شاعیریله ایللر بیر محله ده یاشییب و هم صحبت اولوب و سوزلر اورگنمیشم

    تاسفلر اولسون کی ئوز قدرتی قدر ائلیمیز آراسیندا تانینمادی و حقیقتا ایتگین یاشییب ایتگین دونیادان گئتدی الله روحون شاد ائله سین

  3. سیزین ارزشلی باش ساغلیغینیز اسلام طلب اکبری عائله سینین تسلی خاطری اولدی. سیزدن چوخلی تشکر ائده رک، اوز طرفیمیزدن سیزه و توم محترم تانیشلار، ادبی اجتماعیاتیمیزا باش ساغلیغی وئریریک.

  4. سلام

    سیزدن چوخ تشکور ائدیرم بو خبره گؤره. بو شاعیر منیم داییمیدی. بوگون من اینترنتده چوخ آخداردیم و سیزین سایتیزدا بو مطلبی گوردوم.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

تانینمیش آذربایجان شاعری “رضا ایتگین” آرامیزدان کؤچدو

ایشیق
www.ishiq.net

آذربایجان ادبیات و اینجه‌صنعت سایتی

تانینمیش آذربایجان شاعری “رضا ایتگین” آرامیزدان کؤچدو

ایشیق
www.ishiq.net

آذربایجان ادبیات و اینجه‌صنعت سایتی

تانینمیش آذربایجان شاعری “رضا ایتگین” آرامیزدان کؤچدو

ایشیق
www.ishiq.net

آذربایجان ادبیات و اینجه‌صنعت سایتی