تبریزین گول اوغلو، مهربان اوغلو؛
سیف‌اله اکبری(سیفی)نین ابدی آیریلیغی!
اوره‌ک آغریسیلا دونن گئجه‌یاریسی هئچ گؤزلنیلمه‌دن خالقیمیزین سئویملی اوغلو، تبریزیمیزین مهربان بالاسی سیف‌اله اکبری(سیفی)نی، گنجلریمیزین «سیفی عمی»لرینی ابدی‌لیک الدن وئردیک. گؤزلریمیزین اؤنونده اوزون ایللر خالقین، زحمتکشلرین سعادتی و آزادلیغی اوغروندا دؤیونن سئوگی دولو اوره‌یی سون دؤیونتوسونو یاشادی. نه یالواریشلی باخیشلاریمیز، نه گؤزلریمیزدن آخان آغری، آجی‌لاریمز، نه ده اوره‌یی‌نین باشینا حکیملرین دالبادال ائندیردیگی الکتریک شوک‌لاری چاره قیلمادی؛ بیر کره‌ده اولسون گؤزلرینی آچمادی. سانکی اوزون ایللرین حسرتلرینی، اینجیک‌لرینی، قارا دووارلار آرخاسیندا دفعه‌لرله چکدیگی عذاب- اذیت‌لری بیر یوللوق آتماق ایسته‌ییر‌دی. سون وداعمیز باغریمیزا باسدیغیمیز جانسیز جیسمی و دؤنه- دؤنه اؤپدویوموز یاری قاپانمیش گؤزلری اولدو…
آنا تبریز بیر داها اؤز مهربان اوغلونون ایستی باخیشلارینا ساریلمایاجاق؛ بیر داها ساوالانین، سهندین و اؤلکه بویو باشی اوجا داغلارین سیلدیریم قایالاری تبریزین گول اوغلونو باغرینا باسمایایاجاق؛ یولداشلاری بیر داها خلق‌له گولوب، خلق‌له آغلایان بو جوشغون اومید قایناغیندان دادمایاجاقلار؛ بیر داها ادبی- مدنی ییغینجاقلاریمیز اؤز فداکار و زحمتکش حامیسینی، قایغیکئشینی گؤرمه‌یه‌جک؛ بیر داها «یئنی تبریز» ادبی انجومنی، قوروجولاریندان اولان بو صداقتلی عضوو ایله قیزینمایاجاق؛ داها هئچ بیر زامان بیز ایشیقچیلار بو بشری ایده‌آللار صاحیبی آذربایجان اوغلونون بؤیوک مسئولیتله بیزه گؤندردیگی خبرلری یایمایاجاق… کیم ایناناردی بو واختسیز یوخلوغا، بو اینانیلماز ایتگییه!
فعالیتی دایاندیریلمیش «یئنی تبریز» ادبی انجومنی‌نین قوروجولاریندان اولان و ادبیاتیمیزین، مدنیتیمیزین چیچکلنمه‌سی اوغروندا الیندن گلنی اسیرگمه‌ین اجتماعی فعال سیف‌اله اکبری(سیفی) دی آیی‌نین ۱۹نجی گونونون باشلانغیجیندا ابدی‌لیک آرامیزدان کؤچدو.
بیز «ایشیق» – آذربایجان ادبیات و اینجه صنعت سایتی -امکداشلاری بو آغیر ایتگینی خالقیمیزا، اکبری عائیله‌سینه، عزیز حیات یولداشی و یگانه قیزینا، یولداشلارینا، ادبی- مدنی جمعیتیمیزه باش ساغلیغی وئریب و بوتون حیاتینی زحمتکشلرین سعادتی و خالقین آزادلیغینا حصر ائدن اونودولماز دوستوموز شرفلی انسان سیف‌اله اکبری(سیفی)نین ابدی خاطره‌سینه عشق اولسون! دئییریک.
«ایشیق» – آذربایجان ادبیات و اینجه صنعت سایتی
۱۹ دی ۱۳۹۶
