چئویرن: ایشیق
ترجمه: ایشیق
ایشیق

آذربایجان اوشاق ادبیاتیندا ایکی یئنی کیتاب

تهراندا کی «پیشگامان پژوهش‌مدار» انتشاراتی‌نین «پندار» آدلی اوشاق بؤلومونون طریقی‌ایله، آذربایجان اوشاق ادبیاتی ساحه‌سینده، ایکی یئنی شعر کیتابی بوراخیلدی.

بو کیتابلارین آدلاری و مشخصه‌لری بونلاردیر:


بیرینجی کیتاب:  اوشاق نغمه‌لری – اوستاد حبیب فرشباف

اوشاق باغچالاری، کودکستان و دبستان اوشاقلاری اوچون شعر مجموعه‌سی

• شاعیر: اوستاد حبیب فرشباف آقایی

• رسام: وقار فرشباف آقایی

• علمی ناظیر: دکتر مرتضی مجدفر

• طراح گرافیک: فریبا بندی

• ۳۶ صحیفه، دؤرد رنگ، اعلا کاغاذ، گلاسه جیلد، ۴۲۰۰۰ ریال.

بو کیتابا تانینمیش آذربایجان شاعیری، اجتماعی شخصیت و معلم اوستاد حبیب فرشباف‌ین ۱۸ اوشاق شعری سالینمیشدیر. بو شعرلرین عنوانلاری بئله‌دیر: دۀ او نه دیر؟ / باهار/ یای/ پاییز/ قیش/ گونش و قار/ منیم قیزیم/ قیزیم/ تولدون مبارک/ مدرسه‌دن گلنده/ باجاریق/ سوت/ قویونوم/ تولکو و قارقا/ بالیق اولاجاغام/ پیشیگیم و مستان پیشیک.

کیتابا آذربایجانلی یازیچی و تدقیقاتچی دکتر مرتضی مجدفرین ایکی مطلبی علاوه ائدیلمیشدیر. مجدفر، بو کیتابین علمی ناظیری اولاراق، «سخنی با پدران، مادران و مربیان پیش‌دبستانی» عنوانلی بیر فارسجا یازیدا، بو شعرلردن نئجه تعلیم- تربیه ایشلرینده  فایدالانماغی ایضاح ائدیر. او دئییر کی تعلیم و تربیه وزارتخاناسی‌نین یئنی وئردیگی تدبیره گؤره، اوشاقلار، اوشاق باغچالاری و کودکستان‌لاردا اؤز آنا دیللرینده سؤیله‌نیلن  شعرلر و حئکایه‌لردن فایدالانمالی‌دیرلار. ائله همین ایضاحا گؤره، کیتابین اوستونده «مجموعه‌ اشعاری برای نوباوگان مهدهای کودک، نوآموزان واحدهای پیش‌دبستانی و دبستان‌های مناطق ترک‌نشین» عیبارتی‌ده گؤزه چارپیر. مجدفر، هم ده بو کیتابا «سؤزلوک» آدلی اوچ صحیفه‌لیک آرتیرما(ضمیمه) حاضیرلامیشدیر. بو سؤزلوکده بعضی سؤزلر، اصطلاحلار و بیت‌لر ایضاحلانیر.

جیلدین دالی قابیغی اوستونده، اوستاد فرشبافین شکیلی و ییغجام صورتده ترجمه حالینی اوخویوروق. کیتابین شکیللرینی اوستادین صنعتکار قیزی وقار خانم چکمیشدیر. او ایندی تورکیه‌نین اوشاق یایین ائولرینه یاخیندان اوشاق کیتابلارینی حاضیرلامادا یاردیم گؤستریر. اونون اثرلری تورکیه‌ده چوخ ماراقلا آلقیشلانیر.

ایکینجی کیتاب: باخ گؤر کیم دیر؟ نه‌چی دیر؟ (ایش‌لر و اوشاق‌لار) – دکتر مرتضی مجدفر

اوشاق باغچالاری، کودکستان و دبستان اوشاقلاری اوچون شعر مجموعه‌سی

• شاعیر: دکتر مرتضی مجدفر

• رسام: سام سلماسی

• طراح گرافیک: فریبا بندی

• ۲۰ صحیفه، دؤرد رنگ، اعلا کاغاذ، گلاسه جیلد، ۳۲۰۰۰ ریال.

بو کیتابدا، ایندییه قدر علمی و تربیتی اثرلری، هم ده تورکجه حئکایه‌لری و ترجمه‌لری ایله تانینان دکتر مرتضی مجدفر، اوشاق شاعیری آدی ایله میئدانا چیخمیشدیر. کیتابا مجدفرین ۷ اوشاق شعری سالینمشدیر. شعرلرین ترکیبی حالتلری واردیر. یعنی بو کی مجدفر، ایش‌لرله عائیله عضولرینی بیر- بیرلری ایله قوووشدورموش و تعلیم – تربیه باخیمیندان تلفیقی بیر ایش گؤرموشدور. شعرلرین عنوانلاری بئله دیر: بو «چیچک‌چی» آتام دیر/ منیم « آنام» خیاط دیر/ «پرستار»دیر منیم عمه‌م/ «طیاره‌چی» عمیم‌دیر/ «معلم»دیر خالاجان/ «سوروجو» دور بؤیوک آتام/ «کیتاب ساتان» داییم دیر.

شعری اوخویان اوشاق، عین زاماندا، هم ایشلرله تانیش اولور، هم ده عائیله عضولرینه محبت بسله‌ییر و اونلارلا عاطیفی ایلگی قورور. ائله بونا گؤره،کیتابین اوستونده فارسجا یازیلان بو عیبارتی گؤروروک: «آموزش واحدهای کار آشنایی با مشاغل و آشنایی با اعضای خانواده در قالب شعر برای کودکان مناطق ترک‌نشین.»

بو کیتابا آذربایجانلی یازیچی و تدقیقاتچی ابراهیم اصلانی، فارسجا بیر مؤخره (سون سؤز) یازمیشدیر. اونون «سخنی با پدران، مادران و مربیان واحدهای پیش‌دبستانی و مهدکودک» باشلیقلی مطلبینده، بو شعرلردن نئجه اوشاق باغچالاریندا و کودکستانلاردا فایدالانماق حاققیندا معلومات وئریلیر. او یازیسیندا تربیتی باخیمیندان شعرله یاناشیر و کیتابین اؤزللیکلرینی ایضاح ائدیر. اصلانی، پیشگامان پژوهش‌مدار انتشاراتی‌نین مسئول مدیری دیر.

کیتابین سونوندا بیر صحیفه‌لیک سؤزلوک «معنی برخی واژگان و اصطلاحات ترکی موجود در کتاب» آدی ایله گؤزه دییر. باخ گؤر کیم دیر؟ نه‌چی‌ دیر؟ کیتابی‌نین شکیللرینی، گنج صنعتکار سام سلماسی چکمیشدیر. شعرلرین گؤزه‌ چارپمایان بیر اؤزللیگی ده واردیر و او دا بو دور کی اونلاردا جنسیت فرقی یوخدور. یعنی شعرلری اوخویان هر اوغلان یا قیز، اؤزلرینی شعرلرده عکس ائتدیریب، جانلاندیرا بیلرلر. بو کیتابا شکیل چکن رسام دا، بو اؤزللیگی چوخ گؤزل شکیلده حیاتا کئچیرمیشدیر و دئمک بو کی، شکیللرین هامیسیندا قیز و اوغلان بیرلیکده حاضیردیرلار.

پیشگامان پژوهش‌مدار کیتاب ائوی‌نین شعاری بو دور: «اوشاقلاریمیز آنا دیللرین یاددان چیخارتمامالیدیرلار. کیتابلاری الده ائدین و اوشاقلارین الینه چاتدیرین. ان یاخشی تحفه اوشاقلار اوچون، اوشاق کیتابی دیر.»

کیتابلاری اَلده ائتمک اوچون تهراندا کی ۸۸۳۴۵۲۱۷-۰۲۱ نمره‌لی تئلفونا زنگ و یا ۸۸۳۴۵۲۱۸- ۰۲۱ نمره‌لی فاکسا مکتوب گؤندره‌مه‌لی‌سینیز. ایسته‌دیگینیز کیتابلار در حال، پست یا پیک واسطه‌سیله یوللانیلاجاقدیر.

چاپ

2 پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

آذربایجان اوشاق ادبیاتیندا ایکی یئنی کیتاب

ایشیق
www.ishiq.net

آذربایجان ادبیات و اینجه‌صنعت سایتی

آذربایجان اوشاق ادبیاتیندا ایکی یئنی کیتاب

ایشیق
www.ishiq.net

آذربایجان ادبیات و اینجه‌صنعت سایتی

آذربایجان اوشاق ادبیاتیندا ایکی یئنی کیتاب

ایشیق
www.ishiq.net

آذربایجان ادبیات و اینجه‌صنعت سایتی