چئویرن: ایشیق
ترجمه: ایشیق
ایشیق

sahar barani
کیتاب رفیمیزده نه‌لر وار؟ (۱)
تانیتدیران: سحر بارانی

photo_2016-02-04_13-47-57

سویون آیاق سسی (شعر توپلوسو)
سهراب سپهری
فارسجادان ترجمه ائدن: مسی‌آغا محمدی
[باکی- ۵۲۵-جی قزئت یایینلاری]
حاضیرلایان: سعید موغانلی
گرافیست: سعید شیخ‌بیگلو
انتشارات تکدرخت-تهران-۱۳۹۴-قیش
قطع: رقعی/ تیراژ: ۱۰۰۰
قیمت: ۸۰۰۰ تومان
سهراب سپهری‌نی اؤزل فلسفه و دوشونجه سایاغی ایلا تانیمایان یوخدور. شعرلرینده اذانی یئل دالغالارین قولاغینا اوخویور، پنجره‌لرین اورک دؤیونتوسویله دست‌ناماز آلیر، گاه قوزو دونونا گیریر گاه قیزیل گول، دیلی اؤزونه اؤزل، دونیاسی بام باشقادیر.
کلمه‌لری اینجی تکین دوزوب داش قاش صاندیقچاسی کیمی گؤزللیک و باها بیچیلمز بیر وارلیق‌دیر شعرلری، اوخوجونون آیاغینی یئردن اوزوب قاپیسی ساده‌جه شاعیرین کؤکسوندن آچیلان بیر دونیایا آپاریر.
بو دنیادا هر شئی یئنی آنلام داشییر، کلمه‌لر قاریشیب یئنی‌دن دوغولور، قاوراملار پوزولور، فورمالار دَییشیلیر و سونوندا دوزنسیزلیک ایچینده آخیجی و گؤزل بیر دوزن‌له قارشی قارشییا گلیریک.
سهراب سپهری کیمسه‌یه عاید اولمایان و هر کسه عایید اولان بیر دیلله دانیشیر. شاعیر دئییل سانکی، تَپ تزه آنلاملار تانریسی‌دیر.
«سویون آیاق سسی» «سهراب سپهری»‌نین سئچیلمیش شعرلرینین چئویریسی‌دیر. باکی دولت اونیوئرسیته‌سینین دیلچیلیک و شرق‌شناسلیق اوستادی، مسیح‌آغامحمدی‌نین فارسجادان ترجمه ائتدییی و ۵۲۵-جی قزئتین یایین‌ائوی طرفیندن نشر ائتدییی بو کیتاب، شاعیر و یازار سعید موغانلی‌نین چالیشماسی ایلا یایینلانماغا حاضیرلانیب و «تکدرخت» یایین ائوی‌نین امکداشلیغی ایله یایینلانمیشدیر.

photo_2016-02-04_13-48-30

سئوگی و تانری (شعر توپلوسو)
سئوینج پروانه
کؤچوروب، حاضیرلایان: سعید موغانلی
[باکی‌دا آلاتوران نشریاتی‌ چاپی‌نین اوزوندن]
گرافیست: حامد قلی‌نسب
ناشر: نخبگان، تهران، ۱۳۹۴
قطع: رقعی/ تیراژ: ۱۰۰۰
قیمت: ۸۰۰۰ تومان
شعر سئوگی‌دن یارانیر، سئوگی قادین بارماقلاریندان.
قادین دیلی پامبیقدان یوموشاق پیچاقدان کسکین اولار. دونیانین أن دویغولو أن حساس یانیدیر قادین. اونو آنلاماق اوچون، ایچ دونیاسینا آیاق باسمالی‌سان.
سئوگی و تانری بیر قادینی، ایچ دونیاسینی، دویغولارینی یاشادیغی سئوگی‌لر سئوینج‌لر و زورلوقلاری دورو و آخیجی بیر دیلده اوخوجویا چاتدیرماغی باشاریر.
قادین اولماق و بوتون قارشیلاشدیغی تبعیض‌لره رغمن آیاق اوسته دورماغا هیمت ائله‌مک، بو یولدا مبارزه آپارماق (کیشی‌سل) مردسالار بیر توپلومدا چالیشماق، سئوه بیلمک و حتی رویا قوروب آرخاسیجا گئتمه‌یین آرین و کسکین روایتی‌دیر.
بوتون کلیشه‌لر و گونده مین‌لر دؤنه اوز- اوزه گلدیییمیز قادینسال قونولارلا سیل باشدان، گؤزل و ائتگیله‌ییجی شعرلر یازیب، گاه غم‌لرله آغلاداجاق قدر کؤوره‌لدیب گاه سئوینج‌لرله اوخوجونون الینی توتوب خیال دونیاسینا آپاریر.
شاعر قیوراق دیلی ایله نه دئمک ایسته‌دیینی تماما چاتدیرماغی و دوشونجه گؤزللییی ایله ده یاشادیغی بوتون گونجل اولای‌لاری شعره تؤکوب قلمه آلماغی باشارمیشدیر. کند دونیاسی، ایلک سئوگی، مدرسه و اونیوئرسیته هیجان‌لاری، آنالیق دویغوسو چالیشما حیاتیندا یاشانان چاتیشما و دارتیشمالار اینجه و درین و بعضا شوخ بیر دیلده شعر قونوسودور.
باکی نشریاتیندا و شعر محفل‌لرینده‌ امضاسی بیر چوخ ادبیاتچی‌لارا تانیش اولان، سئوینج پروانه قاراباسانلیقدا قادین سسی‌دیر.
رامیز روشن دئمیشکن «قادین سسی اولمایاندا، ادبیات، هنر داغیلاجاق.»
سئوینج خانیم پروانه‌نین «سئوگی و تانری» کیتابی، شاعر-ژورنالیست سایین سعید موغانلی‌نین اهتمامی ایله یایینلانماغا حاضیرلانیب و نخبگان یایین ائوی واسیطه‌سی ایله یایینلانمیشدیر.

photo_2016-02-04_13-49-07

آرزی ایله قمبر دستانی (بیر اوسطوره و دستاندان، آلتی فرقلی ریوایت)
[کرکوک، آنادولو، طوزخورماتو، هئشتری و کلیس ریوایت‌لری و اوستاد حبیب ساهرین حاضیرلادیغی ریوایت]
تدوین، تصحیح و اتک یازیلار: دوکتور حسن جعفرزاده
چاپا حاضیرلایان: سعید موغانلی
گرافیست: آیخان تبریزلی
ناشر: نخبگان یایین‌ائوی
تهران- ۱۳۹۴- قیش
قطع: رقعی/ تیراژ: ۱۰۰۰
قیمت: ۸۰۰۰ تومان
ائل ناغیل‌لاریمیز دیلدن دیله گزن و اوره‌ک‌لره اوسطوره‌له‌شن، خالق اینانج‌لاری و عنعنه‌لری‌دیر.
ایکی سئوگیلی، ایکی گؤنول قاپدیرمیش گنج، ایکی طالحسیز سئوگی قوشو.
اسکی زامانلاردا کورسو باشینین اولمازسا اولمازی، بؤیوک آنا و بؤیوک آتالارین ناغیل‌لاری، حئکایه‌لر و اؤیکولری ایدی. چوخ زامان وصال شیرینلیگی ایله سونلانیردی ناغیل‌لار و بعضاً ده آیریلیق آجیسی ایلا دلی قانلی اوغوللاری و دویغوسال قیزلاری کدرلندیریردی.
آرزو و قمبر، آتا-بابالاردان میراث قالان شیفاهی ادبیات و کولتوروموردور. اسکی زامانلارین یاشام سایاغی، دوستلوقلار، کینه کدرلر، عایله بیرلییی، بؤیوک چ‌لره حؤرمت… و س، بو ناغیلدا آپ-آیدین گؤز اؤنونه آلینیر. آرزو – قمبر روایت‌لره گؤره عمی اوغلو-عمی قیزی‌دیرلار، داها اوشاق یاشلاریندا بیر-بیرلرینه وورولورلار و بو سئوگی گؤزل دویغو دولو آنلار یاشادیر هم ایکی سئوگیلی‌یه و هم اوخوجویا و دینله‌ییجی‌یه. اما سونو ووصال اولورمو؟؟
آرزو -قمبر ناغیلی ایکی شیدا بولبولون باشلاریندان کئچن اولای‌لاردیر.
بو ناغیل اورتادوغو داستانلارینین دیلدن دیله کئچیب و ائولرده روایت اولان أن یاییغین ناغیلی‌دیر.
آرزو قمبر ناغیلی بیر نئچه روایت‌له او جمله چ‌دن، کرکوک، آنادولو، طوزخورماتو، هئشتری و کیلیس روایت‌لری و سونوندا اوستاد میر حبیب ساهر روایتی ایله، دکتر حسن م.جعفرزاده تدوین و تصحیح ائدیب، سعید موغانلی‌نین چالیشمالاری ایلا چاپا حاضیرلانیب و آیخان تبریزلی گرافیستلیگی ‌ایله ۱۳۹۴ده، تهراندا نخبگان یایین‌ائوی طرفیندن یایینلانمیشدیر.

photo_2016-02-04_13-49-43

تالانچی‌لار (حئکایه توپلوسو)
حبیب ساهر
ساهمانلاییب، حاضیرلایانلار: دوکتور حسن جعفرزاده – سعید موغانلی
انتشارات نخبگان-تهران-۱۳۹۴
گرافیست: سعید شیخ‌بیگلو
قطع: رقعی/ تیراژ: ۱۰۰۰
قیمت: ۱۰٫۰۰۰ تومان
تورک و فارس ادبیاتیندا آچیق- سربست شعر، ایلک اؤنجه اونون اثرلرییله شعر دونیامیزا یول آچدی.
نیمادان اؤنجه فارسجادا سربست شعر یازدی و تورک ادبیات ساحه‌سینده اؤزونه یئنی یول آییردی.
آدی اؤیرتمنلیک‌له آنیلان شاعر-یازار «حبیب ساهر» دوغوردان دا کلمه‌لری سئحیرله‌ییب، شعرده و حئکایه‌ده دینله‌ندیرمه‌یی باشاریردی.
تالانچی‌لار، اوستاد حبیب ساهرین قیسا حئکایه، خاطره و یادداشتلارینین توپلوسودور.
آدینی یازیلارین بیریندن آلان بو کیتاب، حبیب ساهرین ادبیاتیمیزدا آیاق ایزی و آذربایجان حئکایه دونیاسینا تایسیز بیر پای کیمی‌دیر. تالانچی‌لار حبیب ساهرین اؤز ال یازماسی‌ایلا خاطیره‌لر، حئکایه‌لر و شخصی یادداشتلاری‌دیر.
گوجلو دیل و ریوایت ایله اوخوجودا درین ائتگی بوراخان تالانچی‌لارین ال یازمالاری سایین فردی توسطی ایله اوخونوب، دوکتور حسن جعفرزاده جنابلارینین چالیشیغی ایلا تدوین و ایضاحلانمیش و هابئله شاعر-ناشر و ژورنالیست سعید بی موغانلی واسیطه‌سی ایله یایینا حاضیرلانیب و ایلک دؤنه نخبگان یایین ائوی آراجیلیغی ایلا تهران‌دا ۱۳۹۴ ایلینده یایینلانمیشدیر.
دیلیمیزین نثر تاریخچه‌سینی اوخوماق و آراشدیرماق ایسته‌ین بوتون ادبیاتچی‌لاریمیزا بو اثرین مطالعه‌سی توصیه اولونور.

چاپ

3 پاسخ

  1. سلام سحر خانیم بارانی بو کتابلاری یئرلی یاتاقلی وزین ایشیق سیته‌سینده تانیتدیردیغینز اوچون سیزین کیمی آخیجی طبعی اولان سایین شاعیره‌میزه اللرینیز ساغلیق دئییب باشاریلار دیله ییرم.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

کیتاب رفیمیزده نه‌لر وار؟ (۱) / تانیتدیران: سحر بارانی

ایشیق
www.ishiq.net

آذربایجان ادبیات و اینجه‌صنعت سایتی

کیتاب رفیمیزده نه‌لر وار؟ (۱) / تانیتدیران: سحر بارانی

ایشیق
www.ishiq.net

آذربایجان ادبیات و اینجه‌صنعت سایتی

کیتاب رفیمیزده نه‌لر وار؟ (۱) / تانیتدیران: سحر بارانی

ایشیق
www.ishiq.net

آذربایجان ادبیات و اینجه‌صنعت سایتی