اورمولو شاعر، «حسین سنجیده» دونیادان کؤچدو

الیمیزه چاتان خبر اساسیندا، تاسفله اورمولو شاعر، «حسین سنجیده» دی آیی‌نین دوققوزوندا معده خرچنگی خسته‌لیگی سببیندن ۷۰ یاشیندا وفات ائتمیشدیر
اورمو ادبی محیطینده حؤرمتله قارشیلانان شاعر «حسین سنجیده» ۱۳۲۸نجی گونش ایلینده اورمونون «چاووشلار» محله‌سینده دونیایا گؤز آچمیش و بو شهرده ده بیر یوللوق حیاتدان آیریلمیشدیر. اؤز آنا دیلینه صمیمیتله وورولدوغونو شعرلرینده گؤسترن تانینمیش شاعرین ادبی یارادیجیلیغیندان «یازیق آنا، یازیق آنا»، «شعریمه ائل قوناق گلیر»، «گؤورچین»، «موشتولوق» و «نجات نغمه‌سی، ائلیمین سسی» کیمی‌شعر مجموعه‌لری یادیگار قالمیشدیر.
«ایشیق» آذربایجان ادبیات و اینجه صنعت سایتی امکداشلاری، آذربایجان شاعری «حسین سنجیده»نین ایتگیسینی شاعرین حؤرمتلی عائله‌سینه، قوهوم- آشنالارینا و اورمونون ادبی محیطینه تسلیت دئییر و خاطره‌سینی عزیزله‌ییر.

«ایشیق» آذربایجان ادبیات و اینجه صنعت سایتی
۱۰/۱۰/۱۳۹۸

خبرین شکیلی: حسین واحدی

***

گلسه باهار سن ده گل…
حسین سنجیده

بیر من ایدیم، بیر سئوگیلیم، بیر باهار
چکدی بیزی او گون باغا روزگار
باغ‌هانسی باغ، لئیلی مجنون یئری
لئیلی یاریم، مجنونو ائل شاعیری
شاعیر اگر عاشیق اولا شعر یازا
شعری دؤنر سئحره یا دا اعجازا
شعری اولار گؤزللیک‌لر تصویری
جنّت اولار شعرینده بیر باغ یئری
سن ده «نجات» آل قلمی‌فیرچا تک
شعرینده دور او باغدان بیر تابلو چک
قویما قلم ال‌ده بیر آن دینجله
گزدییینیز گؤزل باغی وصف ائله
باغ نئجه باغ جنّته اولموش اکیز
آچدی قوجاغین دئدی خوش گلدینیز
واردیق باغا چون یاریم‌لا بیز بئله
دوشدو اورا سانکی او دم ولوله
نارین-نارین چالدی سازین کولک‌لر
رقصه گلدی‌هامی‌گوللر چیچک‌لر
هر بیر آغاج کی گئیمیش آغ قیرمیزی
گوله-گوله ائیله‌دی پئشواز بیزی
کؤلگه‌سیندن اؤتن زامان قوناق‌لار
سپدی شاباش گول چیچه‌یین دوداقلار
شئپورولار چالدی او دم شئیپورون
گول چیچیه‌یی‌هایلادی: آی قیز، دورون
گلیر بیزه لئیلی و مجنون قوناق
دورون چیخاق ایکی یارا بیز قاباق
اولدو خیر خومارلانان گول‌لره
ایکی یارین دوشدو آدی دیل‌لره
ذؤوقا گلدی‌هامی‌عاشیق سینه‌لر
گول‌لر اوسته اوینادی پروانه‌لر
اؤتدو قوش‌لار عشقین شیرین نغمه‌سین
گؤی‌ده گونش دینله‌دی شنلیک سسین
قیزیل جامین گؤزل باهار عشقینه
سوزدو باغا بیر ایکی یار عشقینه
سالدی غوغا او گون باغا محبّت
بیر ووصالین توتدو جشنین طبیعت
چاتدی سونا او گون بئله سئوگیلیم
آمما بوگون اوره‌ک‌ده یار نیسگیلیم
سنسیز اؤتموش حسرت‌ ایله ایل‌لریم
بوگون یئنه او باغدایام دیلبریم…