گؤرکملی صنعتکار «عاشیق بولود جوادی» حیاتدان آیریلدی

میانا ادبی محیطی‌نین یایدیغی خبر اساسیندا، چوخ تاسفله آذربایجانین گؤرکملی صنعتکاری «اوستاد عاشیق بولود جوادی» حیاتدان ابدی‌لیک آیریلمیشدیر.
عاشیق بولود جوادی ۱۳۱۲نجی گونش ایلینده میانانین «افصل(اوزال)» کندینده دونیایا گؤز آچمیش، اوشاقلیق ایللریندن میانا شهرینده یاشامیش و ۱۴ یاشیندان عاشیق صنعتینه و بو صنعتین سیرلرینی اؤیرنمگه، عین حالدا آنا دیلینده شعر دئمگه ماراق گؤسترمیشدیر. ۱۳۳۵نجی ایلدن رسما بیر عاشیق کیمی‌«تبریز رادیوسو»ندان دعوت آلمیش و بو رادیودا چیخیشلاری اولموشدور. گنج عاشیقین بو ایللرده ایفا ائتدیگی بیر چوخ ماهنی‌لار او جومله‌دن: «کندیمیز»، «ائلات قیزی»، «بولاق باشیندا» و «صفالی تبریز» کیمی‌ماهنی‌لاری دیللر ازبری اولموشدور.
اوستاد عاشیق بولود جوادی‌نین صنعت عالمینده یارادیجیلیق یوللاری چوخ اوغورلو اولور و چوخ تئز بیر زماندا اؤلکه مقیاسیندا باجاریقلی بیر عاشیق کیمی‌تانینیر. شؤهرتی اؤلکه سرحدلرینی آشیر و ایلک چیخیش‌لارینی عمان و کویت اؤلکه‌لرینده صحنه‌لشدیریر.
اوستاد عاشیق گنج یاشلاریندان تبریزدن تهرانا کؤچور و عؤمرونون سونونا قدر بو شهرده یاشاییر. تهران شهرینده «رادیو ایران» واسیطه‌سیله سسی بوتون اؤلکه‌یه یاییلیر و بیر چوخ شهرلرده کنسرتلری اولور. اوستادین تربیه ائتدیگی بیر چوخ شاگردلری بوگون عاشیق صنعتیمیزین اوستاد ایفاچیلاریندان ساییلیر.
آذربایجانین گؤرکملی صنعتکاری «اوستاد عاشیق بولود جوادی»نین یارادیجیلیق ارثیندن یوزلر «کاست» و نئچه مین بیت‌لیک هله ده چاپ اولمامیش شعرلری یادگار قالیبدیر.
«ایشیق» – آذربایجان ادبیات و اینجه‌صنعت سایتی امکداشلاری آدیندان اوستاد «عاشیق بولود جوادی»نین آغیر ایتگیسینی آذربایجان خالقینا، ادبیات و اینجه‌صنعت جمعیتیمیزه، اوستادین حؤرمتلی عائله و قوهوم- اقرباسینا -«باشینیز ساغ اولسون!» دئییر و اوستادین خاطره‌سینی عزیزله‌ییریک.

«ایشیق» – آذربایجان ادبیات و اینجه‌صنعت سایتی
۱۳۹۸/۰۲/۰۳