قاراداغلی شاعر «اسماعیل سلطانی(خاقان)» وفات ائتدی

«اهر ادبی انجمنی»نین یایدیغی خبر اساسیندا، چوخ تاسفله قاراداغین تانینمیش شاعری «اسماعیل سلطانی(خاقان)» وفات ائتمیشدیر. «خاقان» تخلصلی «اسماعیل سلطانی» قاراداغ ماحالی‌نین انقلابدان سونرا ادبیاتا اوز گتیرن شاعرلریندن اولموش و آذربایجان و فارس دیللرینده شعرلر موللیفی‌دیر. «خاقان» ۱۳۳۵-جی ایل اهر شهرینده دوغولموش و ۱۳۹۸نجی ایلین فروردین آیی‌نین ۱۴نجی گونو حیاتینی ایتیرمیشدیر. مرحوم شاعرین اثرلری‌نین بیر سیراسی «گنج پنهان» و «شرح هجران» آدلاریندا نشر ائدیلمیشدیر.
«ایشیق» – آذربایجان ادبیات و اینجه صنعت سایتی امکداشلاری آدیندان آذربایجان شاعری «اسماعیل سلطانی(خاقان)»ین ایتگیسینی مرحومون عائله‌سینه، دوست و تانیشلارینا، آذربایجان ادبی جمعیتینه و «اهر ادبی انجمنی»نین اداره هیاتی و حؤرمتلی عضولرینه تسلیت دئییر و مرحوم شاعریمیزین خاطیره‌سینی عزیزله‌ییریک.

«ایشیق» – آذربایجان ادبیات و اینجه صنعت سایتی
۱۵/۰۱/۱۳۹۸