عکس: اولکر تبریزلی
ائل عاشیغی «عاشیق غفار ابراهیمی» ابدی‌لشدی

چوخ تاسفله آذربایجانین ائل عاشیغی «عاشیق غفار ابراهیمی» دی آیی‌نین ۱۶سیندا، ۶۴ یاشیندا حیاتا گؤز یوموب، ابدیلیک سازدان و سؤزدن آیریلدی.
عاشیق صنعتی ارثیمیزین یورولماز قوروقچولاریندان اولان «عاشیق غفار» ۱۳۳۳نجی گونش ایلینده قاراداغ ماحالی‌نین «مئشه پارا» بؤلگه‌سینده حیاتا گؤز آچمیشدیر. گنج یاشلاریندان عاشیق صنعتینه وورولموش و اوستاد عاشیقلار «عاشیق رسول قربانی»، «عاشیق حسن غفاری» و «عاشیق علعسگر» دن درس‌لر آلمیش و اؤزو ده اوستادلیق سویه‌سینه یوکسلمیشدیر.
اوستاد عاشیق، بیر چوخ مدنی و موسیقی درنک‌لرین فعال‌لاریندان اولموش و دونیانین بیر چوخ اؤلکه‌لرینده او جمله‌دن: سوئد، سوئیس، تورکیه و آذربایجان جمهوریتینده دفعه‌لرله اؤز صنعتینی ایفا ائتمیشدیر. اوستادین یارادیجیلیغی دا چوخ زنگین اولموش و ایندییه‌دک «ائل قوشمالاری»، «سئوگی مقدس‌دیر» و «داغلار منیم اولدو، من ده داغلارین» عنوانلی کیتابلاری یاییلمیشدیر.
ائل عاشیغی «عاشیق غفار ابراهیمی»نین جنازه‌سی آیین ۱۸نجی گونو (سه‌شنبه) تبریزین وادی رحمت مزارلیغی‌نین «قطعه هنرمندان» حصه‌سینده تورپاغا تاپشیریلاجاقدیر.
«ایشیق» – آذربایجان ادبیات و اینجه‌صنعت سایتی، بو آغیر ایتگینی آذربایجان خالقینا، آذربایجان عاشیق‌لار بیرلیگینه و اوستادین حؤرمتلی و صنعتکار عائله‌سینه باش ساغلیغی دئییر، و خاطیره‌سینی عزیزله‌ییر.

«ایشیق» – آذربایجان ادبیات و اینجه‌صنعت سایتی
۱۷/۱۰/۱۳۹۷