آذربایجان ادبی- مدنی درنک‌لری‌نین زلزله فاجعه‌سی مناسبتیله وئردیگی همدردلیک بیاننامه‌سی

 آذربایجان، باشین ساغ اولسون!

 یئنه‌ده، دوغما تورپاغیمیزین باغرینی، یئر ترپنمه‌سی یاردی؛ پالچیق دام‌لار اوچولدو؛ یوخسول ائولر ییخیلدی؛ یورد- یووالار داغیلدی؛ کندلردن بیر چوخو تورپاغا قاریشدی؛ اوچقونلارین آلتینداکی باغیریش‌لار, اینیلتی‌یه چئوریلدی و سوسدو. یئر- گؤی حشیر چکدی؛ کند – شهرلریمیزی قورخو بورودو؛ اوره‌ک‌لر سارسیلدی؛ گؤز یاش‌لاری آل قان اولدو؛ سؤزلر یاندی؛ آذربایجان یاسا باتدی:

اود یوردو ياندي، قوورولدو

کولو دونيايا سوورولدو

یوردوموزا اولان اولدو

وطن داغلاندي- داغلاندي

بو میللی فاجعه‌نی دویان‌لار‌ دا اولدو، دویمایانلار دا؛ دویوب اوست- باستیر ائتمه‌گه چالیشانلار دا؛ خبری ائشیدیب، قولاق آردینا ووران‌لاردا. گئجه سحره جن اوچقون‌لار آلتیندا اؤلولری، یارالی‌لاری چیخاردانلاردا اولدو. بو بیزی جاندان اوساندیردی:

گؤيدن آخدي او اولدوزلار

گئجه‌يه دؤندو گوندوزلر

قانا باتدي چؤل‌لر – دوزلر

وطن داغلاندي – داغلاندي

بیز، آذربایجان ادبی- مدنی درنک‌لری انسان سئور، وطن سئور، ائل سئور انسانلارا اوز توتاراق، اونلاری یاردیما چاغیریریق و اینانیریق کی شرفلی انسانلار بو فاجعه‌دن ضرر چکن وطنداشلاریمیزا، اؤز مادی و معنوی یاردیملارینی اسیرگه‌مه‌یه‌جکلر.

ائل‌لر بیزه درمان وئرين

اوميد يوخسا گومان وئرين

کؤنول سسلي کمان وئرين

وطن داغلاندي- داغلاندي

بیز، بو آجیناجاقلی فاجعه‌نی اؤز فاجعه‌میز سانیریق؛ دردلی‌لرین دردینه اورتاق اولوروق؛ عزیزلرینی ایتیرن‌لره باش ساغلیغی وئریریک؛ یارالی‌لارا ساغلاملیق، یورد- یوواسی داغیلمیش‌لارا دؤزوم و بؤیوک خالقیمیزا اؤلمزلیک دیله‌ییریک و آدربایجان، باشین ساغ اولسون! دئییریک.

×××

  • آذربایجان ادبیات اوجاغی – تهران
  • ایشیق سایتی(آذربایجان ادبیات و اینجه صنعت سایتی) – تهران
  • یئنی تبریز ادبی انجومنی – تبریز
  • چنلی تئل ادبی انجومنی – میانا
  • قاراداغ ادبی انجومنی – تهران
  • شیدا ادبی انجومنی – شهریار
  • صابر ادبی انجومنی – تهران
  • ساهر ادبی- مدنی درنه‌یی- تهران

یئنی امضالار:

  • نباتی ادبی انجومنی – شهریار
  • دده قوربانی ادبی انجومنی – تهران
  • انجمن ادبی صبا – مشهد