چئویرن: ایشیق
ترجمه: ایشیق
ایشیق

کیتاب رفیمیزده نه‌لر وار؟ ۳
تانیتدیران: سحر بارانی

شلاله‌لر شله‌سی
حاضیرلایان: سعید موغانلی
تکدرخت یایین ائوی/ تهران

تسبیحینه قیسقانمازمی‌یام؟
منی
بارماق-بارماق
تسبیح چئویر
دانا-دانا
شاعیرلشیم بارماق‌لاریندا…
سوسن نواده‌رضی
شعر بیر انسانین اؤزل بیر پارچاسی، روحونون باکیر آدالاریندان بیر ایزدیر. شعر روحون اریییب، ایلیق-ایلیق کلمه‌لره آخماسی‌دیر. اونون اوچون اورکدن چیخار، هم ده اونون اوچون اورک‌لر قازانار. بو همان ال دیمه‌میش باکیر لذت‌دیر، روحو بوتون یورقونلوق‌لاردان آلیب عرشه چاتدیراجاق قدر یونگوللشدیریر.
قادین سسی شعر و ادبیات دونیاسیندا نه قدر گوجلو اولسا دا بیر او قدر کؤلگه‌ده قالیب، خصوصیله ایران ادبیاتیندا قادین دونیاسینا آیاق باسا بیلن قادین بلکه بارماق‌لا ساییلاجاق قدر آز اولوب. بونا باخمایاراق کی بعضا قادین یازارلار طرفیندن چوخ گوجلو اثرلر یارانیب اما دیل و دونیاسینی یانسیتماقدا هئچ ده اوغورلو اولماییبلار. گئجه و گوندوز نه قدر فرقلی اولا بیلسه‌لر، ایکی انسانین دونیاسی و خصوصا قادین و کیشی دونیاسی دا او قدر فرقلی اولابیلر. بو شعر توپلوسو بیر قادینین دونیاسی‌دیر، ایچینده مطبخ، ایش دونیاسی، آنالیق، قادینلیق و بوتون بونلارین یانی‌سیرا جنسیته باغلانمایان دوپ دورو بیر انسانلیق وار.
اوخوجو بیر قادینین روح دونیاسینا سئحیرلی بیر سیاحته چیخمیش کیمی آن به آن گؤزل و ال‌چاتماز تجربه‌لرله قارشی قارشی‌یا گلیر.بو کتاب بوتون شعر ماراقلی‌لارینا و خصوصیله بوتون قادین‌لارا یاددا قالیر بیر گؤزللیک اولاجاق.

داریخماق کیمی
شعر توپلوسو
نورانه نور
حاضیرلایان: سعید موغانلی
فرسار یایین ائوی/ اورمو/ ۱۳۹۵

گئدرکن آرخانجا آتدیم
یاز یاغیش‌لاریندان توپلادیغیم گؤز یاش‌لاریمی
دوشونمک-اونوتماق جهدیم‌دیر،
قصورلارینی خاطیرلاماق دا سنه توخونماق‌دی.
شعر اوزلوم،
شاعرلر قیسقانار بو آدی سنه.
یاغیش‌لار بولودلارا قاییداندا گلیم‌می؟

داریخماق کیمی شعر توپلوسو آذربایجاندان اوجالان قادین سیماسی‌دیر. دیل یوموشاق، قاورام گوجلو و سؤزایسه کسگین. شاعر بوتون کائناتا عاشق کیمی یومور گؤزلرینی کلمه‌لرله رویالار دونیاسینا اوچوب زامان و مکانین آنلامینی پوزور، اؤزو ایسته‌دییی بیر دونیا یارادیر. بو دونیانین سونسوز بویوت‌لاری وار و سانترال نقطه‌سی اونون خیال گوجودور. دئمه‌لی نورانه، قادین شعری و قادین دردینی یازیر باکی‌دا…
شعر ایلغیم کیمی آستا اما گوجلو آخیب اوخوجونون روحونا سیزان یولو تاپیر، روحونو اوخشاییر، اونو لحظه‌لردن آلیب رنگلی هم ده زامان‌سیز بیر اؤلکه‌یه آپاریر.

سنین دارانمیش ساچلارینا قاریشدیم
گورجوستان شعری
شوتا یاتاشویلی
چئویرن: سلیم باب‌اله
حاضیرلایان: سعید موغانلی
تک‌درخت یایین ائوی/تهران

سنین دارانمیش ساچلارینا قاریشدیم
سن ایسه اونلاری ائله‌جه کسدیردین و گئتدین،
گوجله خلاص اولدوم
بربرخاناداکی خدمت‌چی قادینین یئکه خکندازیندان…

هر انسان بیر دونیادیر،رنگی فرقلی، سسی فرقلی. شاعر کیم اولور اولسون، هر هانسی دیله، اؤلکه‌یه عاید اولور اولسون کؤرپودور.بو سیرلی-گیزملی دونیالاری ایضاحلاماق اونون رسالتی‌دیر. انسانا فرقلی شاعرلردن بالاجا بیر شعر ده اولموش اولسا، اوخوماق، اونا باغلی بیر قاپینی آچماق دئمک‌دیر. گورجوستان چاغداش شعر نماینده‌لریندن بیرینین شعر کتابی و تانیمادیعیمیز بلکه ده هئچ گؤرمه‌دییمیز بیر اؤلکه‌نین تانیتیم سفیری‌دیر. بیزدن بلکه مین‌لر کیلومتر ایراق‌دا اولان بیر توپلومون عادت و عنعنه‌لری، گونده‌لیک یاشام‌لاری دویغولاری، آرزولارینی بیر جانلی فیلم کیمی بیزه جانلاندیریر. بیر شاعیر اوچون بلکه ان اونملی فاکتورلاردان بیری ده سینیرلاردان آشا بیلمک‌دیر و بو دونیا ادبیاتی ایلا تانیش اولدوغو زامان ممکون اولا بیلر.
گورجو شاعری« شوتا یاتاشویلی»نین آذربایجان خالقینا پای وئردیی شعرلری، باکی‌دا «دونیا ادبیاتی» نشریاتی یایینلامیش، کؤچورولموشو ایسه، تهران‌دا یاشماق یایین‌لاری طرفیندن ایشیق اوزو گؤروب.

آ حرفینه اودوزماق
شعر توپلوسو
سایمان آروز
حاضیرلایان: سعید موغانلی
فرسار یایین ائوی/اورمو/۱۳۹۵

آدین
یعنی دایان!
من دایانیرام
و معجزه
پاپاغینی توولایاراق اوزاقلاشیر.

قولاغا تانیش بیر سس کیمی‌دیر غریب بیر شهرین تنهالیغیندا. انسانین جانینا هوپور، روحونا تومارکیمی توخونور، دنیزین گؤکسونده‌کی دالغادیر، سرین سرین اسن روزگار. او قدر گؤزل دیر شعر دونیاسی آیاق قویدون‌مو چیخاسین گلمیر. الینی اوزاتدیغیندا ایچینه چکیر سنی. داها اؤزون دئییلسن، شاعر اولورسان، کلمه‌لرین آردینجا گئدیب اوشاق کیمی اؤزگورله‌شیرسن.حتی شعرین اؤزو اولوب یاشاییرسان شاعری، آن به آن. سایمان، دیلی کؤورک، مضمونلاری گونده‌لیک یاشامیمیزدا یاشادیغیمیز و بلکه ده اؤنم وئرمه‌دیییمیز ساده اولای‌لاردیر.کلمه‌لرله بیرلشمه‌یی باشاریر.ساده اما درین باخیر دونیایا. اونون اوچون ده اوخوجونون روحونا چؤکور. بلکه ده او بارماق سایی شاعرلردن‌دیر کی شعرلری انسانین ازبرینه دولوب عمور بویو قالاسی اولور.

بغداددا قار یاغیر
حئکایه توپلوسو
محمود مهدوی
حاضیرلایان سعید موغانلی
فرسار یایین ائوی/اورمو/۱۳۹۵

رومان‌لار و حکایه‌لر ادبیاتین تمل دیرک‌لری‌دیرلر. بیر توپلومون دیلی، تاریخی، کئچمیش و گله‌جه‌یینی گوجلو بیر روماندان آنلاماق اولار، اونون اوچون ادبیاتین ایزینی تاریخ‌ده ده گؤرمک ممکندور.
بیر رومانین قالیجی بیر اثر اولاراق اوخوجودا ایز بوراخماسی دیل، محتوا، یازارین خیال گوجو و بونون کیمی بیر نئچه فاکتورا باغلیدیر. بغداددا قاریاغیر دونیانین باشینی قاتان ان چیرکین اولاییندان فرقلی بیر روایت‌دیر. بلی ساواش! اما بو دفعه یازیچی ساواشین او چیرکین پیسلیکلی اوزونو فرقلی بیر دیلده آنلاتماغی سئچیب. ساواش نه قدر غدار و ائوییخیجی اولور اولسون انسانلارین اونو گولوشه توتا بیلمک گوجودور بو کتاب.
قیرخا یاخین ترجمه، رمان، حکایه و … کتابی ایلا ادبیاتدا اؤزونه مخصوص بیر یول آییران محمود مهدوی، یئنه ده فرقلی و گوجلو بیر اثر یاراتماغی باشاریب‌دیر.

ابلیس
دؤرد پرده‌لیک پیئس/نمایشنامه
حسین جاوید
کؤچورن: رامین جبارلی
نخبگان یایین ائوی/تهران/۱۳۹۵

یئدینجی هنرین گوجلو اولماسی و حتی وار اولوب یاشاماسی ادبیاتا باغلی‌دیر. گوجلو بیر سناریو یا پیئس گوجلو بیر فیلم و یا تئاتر دئمک‌دیر. آنجاق سناریو و پیئس یازماق دا اؤزل بیر یئته‌نک گرکدیریر. شانلی اؤلکه‌میزین یئدینجی هنرینه اولان بورجوموزو اؤده‌مک اوچون گوجلو اثرلر یاراتمالی و یا ان آزی چئویریب اویقونلاشدیرمالی‌ییق. ابلیس، حسین جاویدین دؤرد پرده‌لیک بیر نمایش‌نامه‌سی‌دیر.دفعه‌لرله آذربایجاندا صحنه اوستونه گئدن ابلیس بو دفعه ده اؤلکه‌میزین سینماچی‌لارینین استفاده‌سی اوچون عرب الفباسینا کؤچورولوب اویغونلاشدیریلمیش‌دیر. آذربایجانین ان یاخشی یازیچی‌لاریندان بیری اولان حسین جاویددن اونلارجا رمان، شعر توپلوسو و نمایش‌نامه یایینلانمیشدیر. طالع‌سیز یازیچی ان سونوندا استالینیزمین عداوتبنه قوربانلیق گئتدی.

چاپ

یک پاسخ

  1. ساغولون، اللرینیزه ساغلیق
    بو ایشینیز آذرباجان ادبیاتینلا تزه تانیش اولان، هابله سیته نیزین قدیمی اوخوجولارینا چوخ دیرلی بیر ایش اولا بیلر
    اینشالله بو دیرلی ایشینیزه و یئنی یئنی چاپ اولان کیتابلاری تانیددیرماغا داوام ائدرسینیز.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

کیتاب رفیمیزده نه‌لر وار؟ ۳ / تانیتدیران: سحر بارانی

ایشیق
www.ishiq.net

آذربایجان ادبیات و اینجه‌صنعت سایتی

کیتاب رفیمیزده نه‌لر وار؟ ۳ / تانیتدیران: سحر بارانی

ایشیق
www.ishiq.net

آذربایجان ادبیات و اینجه‌صنعت سایتی

کیتاب رفیمیزده نه‌لر وار؟ ۳ / تانیتدیران: سحر بارانی

ایشیق
www.ishiq.net

آذربایجان ادبیات و اینجه‌صنعت سایتی