hamraz
«حسین آقا نادری» دونیاسین دگیشدی
رضا همراز
husen naderi

حسین عمی‌نین وای خبرین ائشیدنده ایستر – ایسته‌مز آذربایجانین تیاتر عرصه‌سینین تانینمیش سیمالاریندان اولان میرزه باقر حاجی‌زاده‌نین حایاتی بیر داها سینما پرده‌سی کیمی‌گؤز اونومده دایاندی. بونلار هر ایکیسی ده تک یاشادیلار و تک اولدولار! اونو تخمیناً ۳۰ ایل اولاردی تانیاردیم. آنجاق، ائله اوتوز ایل ایدی دوستلوغوموز وارایدی. ریحانی قهوه‌سینده بیر سیرا اسکی نشر اولان کیتابلاردان گتیرردی، باخاردیق سونرا اونلارین اوره‌گینه یاتانلاریندان سئچیب وئرردی من اوز خطیم ایله یازیب نشر اوچون رحمتلی اوستاد یحیی شیدایا وئرردیک. او بیر چوخلارینا یئرلی اولاراق کیتاب وئرمه‌سئیدی ده، نه ایسه مندن اسیرگه‌مزدی. حسین عمی‌نین منه امانت وئردیگی سون کیتابی ملا محمّد نخجوانی‌نین «سحاب الدموع» اثری ایدی کی هئچ بیر یئردن تاپانمادیقدا اونا پناه گتیریب اودا بیر نئچه گون سونراسی منیم اختیاریمدا قویدو.
اونو ۶۴-۶۵ینجی ایللرده کیتاب ساتانلاردا گؤروب دؤنه – دؤنه دانیشمیشدیق. چایلاشمیشدیق، خوسانلاشمیشدیق. بو شوخ طبعلی، عین حالدا متانتلی کیشی‌نین چوخلو گولمه‌لی سؤز – صؤحبتینین ائشیده‌نی اولموشدوم. رحمتلی حسین نادری بیر چوخ آذربایجانلی اوشاق کیمی‌بیر تیکه چؤرک آردینجا آتا – آناسی ایله بیرگه تبریزه کوچوب، ایللر بویو آرا – اورتادا کئچینسه‌یدی ده، سونرالار رحمتلی تربتی‌نین دفترخاناسیندا ایشه باشلاییب، ائله اورادان ایسه تقاعد اولا بیلمیشدیر. آدامسیزلیق،‌هابئله یوخسوللوق سبب اولموشدور کی او حایات قورا بیلمه‌سین. بونا گؤره ده تک بیر دامدا ائله عؤمرونون سون گونونه کیمی‌یاشادی! آنجاق تک جانینا!
ایل یاریم بوندا اوّل خیاواندا شانسدان باش منیم، باش حسین عمی‌نین. خوش – بئش دن سونرا معده‌سینده ناسازلیقدان سؤز آچیب، داوا – دوقتور آردیجا گزمه‌ییندن سؤز آچدی. اونا توخداقلیق وئردیم. داریخما دئدیم، دوزه‌له‌جکسن دئدیم . سونرا «درد گلنده خالوار ایله گلر، چیخاندا ، میثقال ایله» مثلین ایشلتدیم . اما ، عؤمور –گونونون یاغینین سونا چاتماسی گؤرونوردو. ساغ اولسون شهرمیزین هنرمندی سایین پاشا‌هادی‌یان کی بو قوجامان کیتابچینی گئدیب تاپیب اوندان نئچه پوز شکیل سالا بیلمیشدیر.
حسین عمی‌یه دئیینده کی حسین عمی‌نئجه‌سن؟ دئییردی ساغ اول قارداش اوغلو. اونا قوجالارا عاید اولان عمی‌کلمه‌سین ایشله‌دنده دئییردی: بیزیم یئرده عمی‌آتانین قارداشینا دئییلیر!! حسین عمی‌حاضیر جواب و نسبتاً شوخلوقچی ایدی. اما اندازادان چیخمازدی بیر چوخ لاری کیمی. حسین عمی‌یه دوستلار اؤز ایچریلرینده «حسین چاپ اول» دئییردیلر. نییه کی او تبریزی قاریش – قاریش گزیب، بیرینجی دؤنه چاپ اولان کیتابلاری توپلایاردی. کیم نه بیلیردی او توپلایان کیتابلار بورادا توپلانیلماسایدیلار، بوگون شاید باشقا بیر یئردن باش چیخاردایدیلار! نه یازیق کی جانیندان چوخ سئودیکی کیتابلارینین بیر چوخون ساتدی ناچارچیلیقدان! کیم نه بیلیر، بلکه ده او ساتماسایدی کیتابلارین بو تئزلیکده هله اؤلمزدی؟ حسین عمی‌سانکی عؤمرونون سون دوراقیندا دایانماغین حیس ائدیردی. نییه کی، آستا – آستا داراشمیشدی کیتابلارینین ساتماسینا! گاهدان حالی خوشلاشاندا یئنه آلیب ائولرینه گتیرردی. او ، هر گون ناهاردان سونرالار ، ایکیندی چاغلاری ائولریندن پیادا چیخیب شهرین اورتاسینا گلردی. بیر آز گزیب – دولاندیقدا قاش قارالاندا و آزاندان سونرا یئنه پیادا ائولرینه ساری یولا دوشردی…
نه یازیق کی فروردینین ۱۲ ینجی گونو بو ۸۵ یاشلی کیتابچی‌نین یولو هئچ کیمسه‌نین خبری اولمادان، آیری بیر یولا دوشدو!! سسسیز – سمیرسیز اؤز همشهریسی میرزه باقر حاجی زاده کیمی‌کیمسه‌نین خبری اولمادان بارماق سایی‌سیندا آدامین مشایعتی ایله تورپاغا گئتدی! روحو شاد ، آدی قالارقی اولسون.