آغاج دلن
حشمت حافظي- چئویرن:ع. آغ گونئيلي

تاق، تاق، تاق…

– كيمدير؟

تاق، تاق، تاق…

– آیدين، بالا گور كيمدير – آنا اوتاقدان چاغيردي.

آیدين ائیواندا، تزه‌جه قایيرديغي اوچورتماسينا, قویروق دوزلديردي. شيريق- شيريق کسديیي کاغيذلاري حالقالایارکن زنجير حالقالاری کيمي بير- بيرينه کئچيردی. آیدين اوچورتماسي‌‌نين قویروغونو زنجير‌لتمک ايسته‌یيردی. آیدين آناسي‌نين سسيني ائشيدرکن گئديب قاپيني آچدي، هئچ ‌کيمي گؤرمه‌دي. تزه‌دن ائیوانا قایيتدي. اوتوروب- اوتورماميش تزه‌دن قاپيني دؤیدولر: تاق, تاق, تاق…

عصبي‌ليکله یئنه ‌ده قاپي‌یا ساري گئتدي. بو د‌ؤنه ‌ده کيمسه‌ني گؤرمه‌دي. اؤز- اؤزونه بئله دوشوندو کي، بلکه بير دجل اوشاق اونو ساريیيب اينجيتمک ايسته‌یير. قاپيني آچيق قویدو، اگر اورا یاخينلاشان اولسا اونو گؤره بيلسين.

تاق- تاق- تاق…

بو دؤنه قاپيدان چوخ اوزاقلاشماميشدي و بير‎ده‌کي قاپی آچيق‌ايدي، آنجاق  یئنه کيمسه گؤرونمه‌دي.

حئیرته دالاراق تعجّوبلو- تعجّوبلو حیطين اورتاسيندا دایانميشدي.

آناسي اوتاقدان چاغيردي:

–           قاپي دؤین کيمدير؟

آیدين باشيني قالديردي, آناسينا جاواب وئرسين كي، بيردن گؤزلري حیطين قيراغينداکي یاشلي بؤیوک آغاجا دوشدو. بیر قوش آغاجين گؤوده‌سينده اوتورموشدو و اوتوردوغو گؤوده‎یي سورعتله ديمديک‌له‌یيردي. تاق- تاق سسي چيخاريردي. آیدين اهمالجا قوشو آناسينا گؤستره‌رک دئدي:

–           قاپيني دؤین باخ بو قوشدور.

آنا پنجره‌دن ائشيیه باخاراق گوله- گوله دئدي:

–           بو قوشون آدي آغاج دلن‌دير، دوزدور بو تاپدالایان آغاج دلينميش.

–           آناجان نه اوچون بو آغاج‌دلن بئله بيزيم آغاجيميزي یارالایير- دئیه آیدين آناسيندان سوروشدو؟ من اينديجه گئديب اونو داشلا وورارام بلكه، بيزيم آغاجيميزي یارالاماسين.

–           یوخ آیدين ‌جان، بو ايشي گؤرمه, آغاج‌دلن‌لر هئچ واخت آغاج‌لارا زیان یئتيرميرلر، بلکه اونلارين بو ايشي آغاج‌لار اوچون چوخ دا فایداسي واردير. آغاج‌دلن‌لر برک و اوزون ديمديک‌لري‎ايله آغاج‌لارين قابيق‌لاريني دئشيب اونلارين آلتيندا گيزله‌نن زیانکار قورد- قوش‌لاري یئيرلر. بئله‎ليك‌له اونلار آغاجلاري زیانكار قورد- قوشلارين زيانيندان قورتارارلار. من ايسه چوخ سئوينيرم ‌کي، بو آغاج‌دلن بيزيم ائوده‌کي آغاجي تاپيب و اونون ساغلامليغينا یارديم ائله‌یير.

آیدين دئدي: ايندي آنلاديم نه اوچون آغاج‌دلن‌لر آغاج‌لاري تاق- تاق تاققيلداديرلار.

آنا دئدي: دئیه بيليرسن آغاج‌دلن‌لر نه اوچون آغاج‌لاري دؤیورلر.

– آغاج‌دلن‌لر قاپيني دؤیورلر كي، قورد- قوش‌لار ائشيیه چيخان کيمي اونلاري دوشوروب یئیه‌لر.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4