چئویرن: حبیب فرشباف
ترجمه: حبیب فرشباف
حبیب فرشباف

ایکی قونشو کند واریدی. یـوخاری چاخماق بولاق، آشاغی چاخماق بولاق. نئچه ایل قاباق دولو یاغیب بوتون اکینی آرادان آپاردی. بئله اولاندا هر ایکی کندین آداملاری شهره کؤچوب، کندی بوراخدیلار. کندلر بوش قالدی. ایکی قارداش داغداکی ماغارادان آشاغی ائنیب، کنده گلدیلر. قارا آیی یوخاری کندده، ساری آیی‌دا آشاغی کندده ساکین اولدولار. آیی‌لار- بئکار قالمایاق‌- دئـیه، زمی‌لری شوخوملایـیب بوغدا اکیردیلر. آیی‌لارین ایشلمه‌سی بولودلارین خوشونا گلیردی؛ بونون اوچون اونلارین زمی‌لرینی بیر آن سوسوز قویموردولار..

بو ایل ده گؤم‌- گؤی زمی‌لر یـئل اسدیکجه، دنیز کیمی دالغالانیردی. گونش زمی‌لری گؤروب وجده گلدی. او، قیزیل شفق‌لریله بوغدالاری برکیدیب، ساپ‌- ساری رنگه بویادی. بیر گون قارا آیی یـئتیشمیش سونبول‌لری یـیغیب، خرمنه گتیردی. سونرا سونبول‌لری دؤیوب، سامانینی آیـیردی. ساپ -ساری تمیز بوغدالاری تلیس‌لره دولدوروب، بیر- بیر آنبارینا داشیدی. ائرته‌سی‌ گون آنبارا گیریب، بوغدا تلیس‌لرینی سایماغا باشلادی. او، سول الی‌نین بارماق‌لارینی بیر- بیر ساغ الی‌له بوکوب، تلیس‌لری سایدی. تلیس‌لرین سایی، اونون سول الی‌نین بارماق‌لارییلا دوز برابر ایدی. قارا آیی سئوینجیندن اوجادان بؤیـوردو، آخی بو ایل اونون محصولو اؤتن ایلدن ایکی تلیس چوخ اولموشدو. قارا آیی بو قرارا گلدی کی، تلیس‌لرین بیرینی قارداشینا پای وئرسین. قارا آیی فیکیرلشدی کی، بو ایشی گیزلیجه گؤرسه، داها آرتـیق قارداشی‌نین سئوینجینه سبب اولار. بئله اولاندا گئجه یاری یـوخودان دوروب، تلیس‌لرین بیرینی دالینا آلیب یـولا دوشدو. او، تلیسی آپاریب، قارداشی‌نین آنبارینا قویـوب، سس‌سیز- سمیرسیز اؤز کندینه قاییتدی. او گئجه سحره‌دک بال کیمی یوخویا گئتدی. صاباحی گون آنبارا گیرنده، قارا آیی گؤزلرینه اینانمادی! اونون تلیس‌لری ‌یئنه ‌ده بئش‌ دنه اولموشدو. او، دؤنه‌- دؤنه سول الی‌نین بارماق‌لارینی بیر- بیر قاتدایـیب، تلیس‌لری سانادی. تلیس‌لر دوز بـئش‌ دنه ایدی. بو ایش یقین جین‌- شیطانین ایشی‌دیر- دئـییب، قارا آیی فیکره گئتدی. ایندی کی، بئله‌دیر، هر گون بیر تلیس قارداشیما آپارارام، قوی جینلرده هر گئجه بیر تلیس منه گتیرسینلر- دئدی. یـئنه گئجه ‌یاریسی بیر تلیسی دالـینا آلیـب، سس‌سیزجه آپاریب قارداشی‌نین آنبارینا قویوب، قاییتدی. قارا آیی گون چیخارکن آنبارینا باش ووردو. یئـنه ‌ده جین‌- شیطانلار بیر تلیس بوغدا اونون آنبارینا گتیرمیشدیلر. اونا داها یـقین اولدو کی، بو ایش بیزدن یـئیی‌لرین ایشی‌دیر. اوچونجو گئجه، یـئنه قارا آیی بیر تلیسی سئوینجک دالینا آلیب یـولا دوشدو. هله کنددن چوخ اوزاقلاشمامیـشدی کی، یـولون اورتاسیندا بیر قارالتی گؤزونه ساتاشدی. – یـقین جینلردیر- دئـییب، بیر داشین دالیندا گیزلندی. قارالتی گئت به گئت اونا یاخیـنلاشدی. بیردن اؤز قارداشی ساری آیـینی گؤروب، ائشییه توللاندی. ساری آیی‌نین ‌دا، بیر بوغدا تلیسی دالیندا‌یدی. ایکی قارداش یـولون اورتاسیندا بیر- بیرینی باغرینا باسدیلار.

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

قارداشلیق

حبیب فرشباف
www.ishiq.net

آذربایجان ادبیات و اینجه‌صنعت سایتی

قارداشلیق

حبیب فرشباف
www.ishiq.net

آذربایجان ادبیات و اینجه‌صنعت سایتی

قارداشلیق

حبیب فرشباف
www.ishiq.net

آذربایجان ادبیات و اینجه‌صنعت سایتی