ياغيشدا پيشيك / ارنست همينگوي
چئوير‌ن: فيروز رفاهي

هتل‌ده يالنيز ايكي آمريكالي وار ايدي. اونلار اوتاقلارينا گل- گئت ائده‌نده يولدا گؤر‌نلرين هئچ بيريسيني تانيماييرديلار. اوتاقلاري ايكينجي مرتبه‌ده دنيزه باخيردي. پنجره‌دن محاربه خاطيره‌سينه اوجالان سوتون و عمومي پارك گؤرونوردو. اورادان باغداكي اوجا پالم آغاجلاري و ياشيل نيمكت‌لر سانكي گؤز قاباغيندا ايدي.‌هاوانين ياخشي چاغيندا بير رسّام دزگاهيله باغا گلردي. رسّام پالم آغاجلارين بوي آتماسيني و دنيزين اؤنونده‌كي باغچالارين الوان رنگلريني چوخ سئويردي. ايتاليالي توريست‌لر بو سوتونو سئير ائتمك اوچون چوخ اوزاقلاردان بورايا تؤكولوردولر. سوتون بورونزدان تيكيلميشدي. او، ياغيش آلتـيندا پاريلداييردي. ياغيش برك ياغيردي. ياغيشين دامجي‌لاري پالم آغاجلاريندان يـئره دامجي‌لاييردي. سو گؤل كيمي قوملو يوللاردا ييغيشميشدي. دنيز اوزون بير خط كيمي ساحيلده كسيليب آرخايا ساري آخيردي كي، يئني‌دن هجوما كئچسين. مئيداندا سوتونون يانيندا دايانان بوتون داشيييـجي موتورلار گؤزدن ايتميشدي. مئيدانين باشينداكي كافه‌نين آستاناسيندا بير قوللوقچو دايانيب، بوش مئيدانا باخيردي.
آمريكالي قيز پنجره‌نين اؤنونده دورموشدو. او، ائشيگه باخيردي. بير پيشيك پنجره‌نين دوز آلتـيندا بوزوشوب دايانميشدي. ياغيش ميزين يانلاريندان دامجي- دامجي يـئره آخيردي. پيشيك اؤزونو ائله بوزوردو كي، سو دامجي‌لاري اوستونه ياغماسين. آمريكالي قيز دئدي:
– گئديم او پيشيگي گؤتوروم.
اري ياتاقدان دئدي:
– من گئده‌رم.
– يوخ، اؤزوم گؤتوره‌رم. يازيق پيشيك چوخ چاليشير كي، ميزين آلتـيندا ايسلانماسين. اري يئنه اوخوماغا قوشولدو. او، ياتاغين آشاغي باشيندا ايكي باليشي آرخاسينا قويوب اوزانميشدي. او، دئدي:
– ايسلانماياسان.
قادين آشاغي مرتبه‌يه گئتدي. هتلين يييه‌سي اونو گؤر‌ن كيمي، ديك آياغا قالخيب، اونا باش ايدي. پاترونون ميزي ايش اوتاغين يوخاري باشيندا ايدي. او، اوجا بويلو و ياشلي بير كيشي ايدي.
قادين، قاپيچي‌ني خوشلاييردي، بونا گؤره دئدي:
– ايل پييو.
– سي، سي سينيـورا بروتو تمپو.‌هاوا چوخ پيس‌دي.
او، هله ده قارانليق اوتاغين او باشيندا ميزين داليندا آياق اوسته دايانميشدي. قادين اوندان خوشلانيـردي. اونون شيكايت قبول ائده‌نده كي، جيددي گؤرونوشونو چوخ سئويردي. كيشينين اؤزونو بير هتل قاپيچي‌سي كيمي آپارماسي قادينا خوش گليردي. قادين قاپيچينـين آغير و ياشلي اوزونو ائله‌جه ده بؤيوك اللريني بيه‌نيردي.
قادين بو حيسّلرله قاپيني آچيب ائشيگه باخدي. ياغيش چوخالميشدي. باشينا رئزين پاپاق كئچيردن بير نفر بوش مئيداندان كافه‌يه ساري كئچيردي. پيشيك ساغ ياندا بير يـئرده اولمالي‌دي. هئره‌لرين آلتـيندان كئچه بيلردي. او، هله قاپينـين آستاناسيندا دايانميشدي كي، بيردن بير چتير آرخاسيندا باشينـين اوستونده آچيلدي. چتيري آچان اوتاقلاريني سيل‌- سوپور ائد‌ن قادين ايدي.
او، ايتاليانجا دانيشيب، گولومسه‌دي:
– سيز ايسلانماماليسينيز.
اونو بورايا هتلين قاپيچي‌سي گؤندرميشدي. او، قوللوقچونون باشي اوسته توتان چتيرله قوملو يولدا پنجره‌لرين آلتـيناجان گئتدي. ميز اورادا ايدي. رنگي ياغيش آلتـيندا يام- ياشيل اولموشدو. آمما پيشيك اورادا دئييل ايدي. قادين بيردن- بيره اومودونو الدن وئردي. قوللوقچو اونون اوزونه باخدي.
–‌ها، پئردوتو گئلكو كوزا، سينيـورا؟
آمريكالي قيز دئدي:
– اورادا بير پيشيك واريدي.
– بير پيشيك؟
– سي، ايل كاتو.
قوللوقچو گولومسه‌دي.
– بير پيشيك؟ ياغيشدا بير پيشيك؟
آمريكالي دئدي:
– ائله‌دير. ميزين آلتـيندا ايدي. آه، من اونو چوخ سئوديم. من بير پيشي‌بالا ايسته‌ييرديم (كؤنلومدن بير پيشيك بالاسي كئچيردي).
آمريكالي اينگيليسجه دانيشاندا قوللوقچونون اوزو بوزوشدو. او، دئدي:
– گلين گئده‌ك سينيـورا، بيز همن ايچري گئتمه‌لي‌ييك. سيز جيمجيلاق اولاجاق‌سيز.
آمريكالي قيز دئدي:
– منه ده ائله گلير.
اونلار قوملو يولدان قايـيداراق قاپيدان ايچه‌ري كئچديلر. قوللوقچو بيرآن چتيري باغلاماق اوچون ائشيك‌ده داياندي. آمريكالي قيـز پاترونون اوتاغينـين قاباغيندان كئچه‌نده، او، يئنه قيزا باش ايدي. قيز ايچينده سرت بير شئي حيسّ ائتدي. پاترونون بو ايشي اوندا موهوم و عئيني حالدا بالاجا بير آدام اولماق حيسّيني ياراتدي. بيرآندا فيكرلشدي كي، چوخ مهم بير آدام‌دير. قيز پيلله‌كاندان يوخاري قالخدي. اوتاغينـين قاپيسيني آچدي. جورج هله ده ياتاغينـين اوستونده اوزانيب اوخويوردو. جورج كيتابي آشاغي ائنديريب سوروشدو:
– پيشيگي توتدونمو؟
– گئتميشدي.
اوغلان گؤزلرينه بير آن دينجه‌لمه امكاني وئره‌رك دئدي:
– بيلمه‌دين‌هارايا گئديب‌دير؟
قيز ياتاغين اوستونده اوتوردو. او، دئدي:
– اونا برك وورولموشدوم. بيلميرم نه اوچون بو قده‌ر اونو سئوديم. او يازيق پيشيگي ايسته‌ديم. ياغيش آلتـيندا بير يازيق پيشيك اولماق هئچ ده گولمه‌لي بير شئي دئييل.
جورج يئنه ده اوخوماغا داوام ائتدي. قيز پالتار سويونان ميزين اؤنونده اوتوردو. بير ال‌ گوزگوسونده اؤزونو سئير ائتمه‌يه باشلادي. او، اؤنجه اوزونون بير طرفينه سونرا ايسه او بيري يانينا باخدي. سونرا باشينا و بوينونون آرخاسينا گؤز گزديردي. او، گوزگوده اؤزونه باخا- باخا سوروشدو:
– ساچلاريمين اوزالتماسينا نئجه باخيرسان، ياخشي اولار؟
جورج يوخاري‌يا باخاندا بوينونون داليسيني گؤره بيلدي. قيز ساچلاريني اوغلانلار كيمي قيسالتميشدي. جورج دئدي:
– من اونو نئجه كي وار سئويرم.
قيز دئدي:
– آرتـيق اوندان بئزميشم. اوغلانلارا اوخشاماقدان داها يورولموشام.
جورج يـئريني ياتاقدا دييشدي. قيز دانيشاندا، گؤزلريني قيزا تيكميشدي. او، دئدي:
– سن چوخ گؤزل گؤرونورسن.
قيز گوزگونو ميزين اوستونه قويدو، پنجره‌يه ساري گئديب ائشيگه گؤز گزديردي.‌هاوا ياواش- ياواش قاراليردي. او، دئدي:
– چوخ ايسته‌ييرم، ساچلاريمي محكم چكيب ائله بير دويون دوزه‌لدم كي، اونو هرآن داليدا حيسّ ائديم. بير دنه ده پيشيگيم اولسون. او، ديزيمين اوستونده اوتورسون و من اونو اوخشاياندا خورولداسين.
جورج ياتاقدان دئدي:
– ائله‌مي؟
– چوخ ايسته‌ييرم ميز باشيندا اوتوروب، شام يئيه‌نده اؤنومده شاملار يانسين و قاشيقلار‌هاميسي گوموشدن اولسون. كؤنلوم ايسته‌يير ياز اولسون. من ده گوزگونون قاباغيندا ساچلاريمي داراييم. ايسته‌ييرم بير پيشيگيم اولسون. تزه- تزه پالتارلاريم اولسون.
– آز دانيش، گؤتور بير شئي اوخو.
جورج بونو دئييب، يئنه اوخوماغا داوام ائتدي.
آروادي پنجره‌دن ائشيگه باخيردي.‌هاوا قارالميشدي و ياغيش هله ده پالم آغاجلارينا ياغيردي. او، دئدي:
– هر حالدا من بير پيشيك ايسته‌ييرم. من بير پيشيك ايسته‌ييرم. ايندي بير پيشيك ايسته‌ييرم.اگر اوزون ساچيم يوخدورسا، يا باش آلداديجي بير ايشيم اولماسا ، بير پيشيگيم كي، اولا بيلر. جورج اونا قولاق آسماييردي. او، كيتابيني اوخويوردو. آروادي پنجره‌دن ايشيقلاري سؤنموش مئيدانا باخيردي. كيمسه قاپيني چالدي.
جورج كيتابين اوستوندن قاپي‌يا باخيب، دئدي:
– آوانتي.
قاپيني چالان قوللوقچو قادين ايدي. او، توسباغايا اوخشار بير پيشيگي محكم توتموشدو. پيشيگين ال-آياغي‌هاوادا ساللانيـردي. قادين دئدي:
-باغيشلايين، پاترون بويوردو بو پيشيگي سينيـورايا گتيريم.