ashrafi
شعرلر
منصوره اشرافي- چئویرن:عليرضا ذيحق
zihagh

 منصوره اشرافي، چاغداش ايران شعرينين ساييلان آدلاريندان و قادين شاعيرلر ايچره، چئشيدلي بير پوئزيا ميراثينا صاحيب‌دير. اونون ياراديجيليغينين اساس مضمونلاري، دؤيوشجول بير قادين روحونو و دويغوسونو تمثيل ائده‌رك، اجتماعي حسرت‌لر و انسانلارين انسانليق آدينا آپارديغي مبارزه و آجي‌لاردان سؤز آچماقدير. منصوره اشرافي‌نين “تيكان تاجي”(2005م) و “گونشيم‌هاردا دير” (2007م) آدلي  شعر كيتابلاري  تهراندادا چاپ اولوب ياييلاراق چوخلو شعرلري‌ده اينترنت وب صحيفه‌لرينده  اؤز اوخوجولاريني تاپاركن، قاباقجيل بير روح داشييير. اونون دويغوسال و يئنيلييه آدديملايان فارسجا شعرلريندن بير نئچه‌سي آذربایجان‌توركجه‌سينه ترجومه اولاراق تقديم اولونور:(علیرضا ذیحق)

(1)  تاپشيريق

 دنيزي سو آپارير

و قوشي

اوچماق، اوچوشماق.

قورتولوش

و قورتولماق اوچون

اؤزوموزو اونلارين

هانسينا

تاپشيرماق گره‌ك؟

آنجاق

داش اولوب داشلارا

دؤنمه‌مك گره‌ك

حتتا او چاغلاركي

گونش‌ده ايچ قورخوسون

گيزله‌ديب بيلديرمير.

(2)  سئوگي

سئوميرم سئومكلرين

گؤزلريم اوچون‌سه

ساچلاريم اوچون‌سه

يادا كي

ووجودوما خاطيرسه.

ايسته‌رم كي

سئويلم

سئوه‌لر مني ده

ائله بو تهر

نئجه كي وارام

بوگونكي كيمي

يا كي صاباحلار

نه تَهَر

اولدوغوم كيمي

تام ايستكلريمله

دويغولاريملا

و دوشونجمله.

(3)  تيكان تاجي

بو تيكانلي تاج

كيمين‌دير

كيمسه‌نين‌دير

دوشوب بئله آياغ آلتینا.

آه

آي مسيح

پئشمانام و اوتانجاق.

تاجيني باشا قويوب

سنين يئرینه

يئره دوشوب

تورپاقلارا

قاووشمالييام .

(4)  گونشيم‌هاردادير

تاريخ بويو قاچاراق

گونشي سسله‌ميشَم

هاردادير

هاردا قاليب

منيم او

بَخ گونشيم.

چوخ يورغونام.

بير كوله‌يَم

سئويلميشم

من قادينام !

حاصارلار داليندا

سعادت آدي‌له قورولان

سيّار بير كرخانا.

بؤلونوبدور سعادتيم

هفته‌نين گونلرينه

نه آز نه چوخ

لاپ دا برابر.

گئت- گلده‌يم

مكعب‌لر ايچره

و ايته‌جه‌يم

ائو‌له گورون

آراسيندا.

منيم خوشبَختلي‌ييم

باتيق قاب‌لار ايزدَحاميندا

چيرکلي پالتارلارين

هوجوموندا

دوغماق‌لا بؤيوتمه‌يين

لاپ آراسيندا

اؤز ياديمدان دا چيخيبدير.

من يورغونام.

داها هئچ ده ايسته‌ميرم

سئويب سئويلمه‌يي

كيشي شاعيرلرين

شعيرلرينده

و توزا بورونموش

اَل چاتماز كتيبه‌لرده.

تاريخ بويو قاچاراق

گؤزلو – گؤزلو كور ایدیم

ديللي آغيزلي لال ايديم

دينله‌ييب ائشيده‌رك

قولاقلي بير كار ايديم.

و آرادا اونلار ايديلار

كيشي‌لر كي

منيم يئريمه

دئييرديلر

يازير ديلار.

بيركوله‌يم

سئوير‌لر مني

چوخ چوخ دا

 مهربانديلار

اوندا كي دينمه‌دن

هر زادا ، هر بير ايشه

اَييرم اؤز بوينومو!

ايسته‌ييرلر

سئويرلر

بير گول تكين

بير شوشه‌نين ايچينده‌كن

نييه كي

قورخورلار

باشقا اَللر

دره مني.