۹۱۹۱۹۰
خیال پرده‌سی
محمدعلی ضیایی
چئویرن: حسین واحدی
vahedi

… قادین قیشیردی (بلکه ده من بئله گومان ائتمیشدیم) :
-‌ دئدیم دا! سنه احتیاجیم یوخدو. مه‌یه من ائلییه‌ بیلمه‌رم بو ایشی تک‌باشیما گؤره‌م؟
تله‌سیردیم، آما ماراقدان، آددیملاریم سارسیلدی. قادین، اوتوز قارلی فصیلی گؤرندن داها چوخ گنج ایدی. بوندان داها تئز یئنی چادیرا ایله ده‌ییشه بیله‌جه‌یی کؤهنه چادیراسینی، فرنگی قونداغین اوستونه چکمیشدی. سورتولموش پالچیقلی و دابانلی باشماقلارینی، جَمده‌ک کیمی‌یئرده سوروتله‌ییردی. کیشی اونا ساری آتیلیب، اوز-اوزه‌سینده دایاندی. ألینی قالدیردی و سانکی یئنی‌جه بیر مؤوضوعنو آنلاییبدیر‌ دئیه یان‌ یؤوره‌سینه باخدی. مندن سونرا بیر-ایکی نفر یولدان کئچن ده وار ایدی. یقین بیزیم اولماغیمیزین قرارینی ده‌ییشمه‌یه یئترلی اولدوغو اوچون، ألینی یاواشجا قادینین چییین‌لرینه کیمی‌آشاغی ائندیریب، علاجسیزلیق‌لا دئدی:
-‌ آبیریمیزی آپارما آرواد! گل گئده‌ک ائوه! نه زامانا کیمی‌بو‌های-کویو سالاجاقسان؟
کیشی ایکی ألین بارماقلارینین سایی‌سیندان، قادیندان داها یاشلی گؤرونوردو. آریق و ضعیف ایدی، آغ‌قارا فیرچا کیمی‌ساققال و قاراشین کوت شالواری چیرکلی دئییلدی، آما کؤهنه نییه. ألینی قادینین چییین‌لریندن آشاغی زویدوروب، قادینین ألینی توتوب اؤزونه ساری چکدی و بو دفعه داها مولاییم، کلمه‌لری دیشلرینین آراسینداکی دئشیکلردن ائشییه گؤندردی:
-‌ بوگون همیشه‌دن داها چوخ یورقونام. بوندان آرتیق اینجیتمه منی!
قادینین صوفتی سویوقدان قیزارمیشدی و کیشینین  بو سؤزوندن داها چوخ قیزاردی. زویموش چادیرانین بوجاغینی یئنی‌دن و نئچه‌نجی دفعه اولاراق قونداغین اوزه‌رینه چکیب، اوجا سسله دئدی:
-‌ اینجیتمه؟ اوشاغی دوکتورا آپارماق اینجیتمکدی؟ سنه ده دئیرلر آتا؟ اوشاغیمیزین تبی وار او زامان سن ده دئییرسن قاییدیم ائوه؟
کیشی تیریاکی‌لره اوخشاییردی. اولدن ده چیلغین گؤرونوردو و ایندی، داها سینیرلی اولموشدو. فقط دئیه بیلدی:
-‌ لااله‌الاا..، آللاه اؤزون کؤمه‌ی اول! سنه قوربان اولوم بو نه جور امتحاندی سیناقدی؟
کیشی‌نین ظالیملییی منی حیرصلندیرمیشدی. اوشاقلاریم مدرسه‌لرینین اؤنونده منی گؤزله‌ییردیلر و گئتمه‌ییم گرکلی ایدی آما گئتمه‌دیم.
بیر آن، اوشاقلاریمین بیرینی قیرخ درجه تب ایچینده قونداقدا تصور ائتدیم. قادین چاره‌سیزلیکدن نئچه نفرلیک قاوقادا اولان تکجه قادینا اوز توتوب دئدی:
-‌ خانیم! سیز دئیین من بو کیشینین ألیندن نه ائدیم؟ اوشاغیم خسته‌دی، قویمور آپارام دوکتورا.
یاواش سوروشدوم:
-‌ تیریاکی‌دی؟
قادین دیسکینیب دالا چکیلدی:
-‌ یوخ خانیم! بو سؤزلر نه‌دی دئییرسن. اخلاقی پیسدی. ایشینده جدی‌دی. قورخورام بو ایشی‌نن اوشاغیمی‌گودازا وئره.
کیشی حؤوصله‌سیز جاواب وئرمه‌یه مجبور قالدی:
-‌ اوشاق نه‌دی آرواد! بیزی بو قاوقانین أله سالینمیشی ائله‌مه. بو نئچه ایلده، مین دفعه منه زجر وئریبسن، بَسیم دئییل؟
نه دئدییینی باش تاپمیردیم آما اوزلولویوندن جانا گلمیشدیم. قادین، چادیرانین آلتیندا اوشاقجاسینا کؤرپه ایله دانیشیب قوربان کسیردی. کیشی شالوارینی یوخاری چکیب، قاییشینی برکیتدی. ألینی جئبینه آپاریب بوزولموش بیر دسمالی چیخارتدی، اوزونون ترینی سیلیب سونرا سانکی دقیق بیر قاضی یانیندا دایانیب اعتراف ائدیر دئیه، اوتانجاقلیق‌لا پیچیلدادی:
-‌ بیر گئجه اوشاغیمیزین تبی وار ایدی … ایشدن یئنی‌جه ائوه گلمیشدیم … یورقونویدوم … مسئله‌نی جدی توتمادیم … نئچه ایل بوندان اوولیندی … اوشاغیمیزی ألیمیزده ایتیر … منیم باشی سویوقلوغوم … ایندی من قالمیشام و بو خسته قادین …
سؤزلری ناغیلا بنزه‌ییردی و من آلدانمایا اونون گؤزیاشی ایله ایسلانمیش گؤزلریندن داها چوخ ایستی-سویوق چکمیش ایدیم. قادین سؤزو ایله منده اولان لاپ آز شوبهه‌نی ده آرادان آپاردی:
-‌ خانیم گؤروسن! آتا محبتی ایچینده اؤلوب. من خسته‌یم یوخسا بو گوناهسیز بالاجا اوشاق؟
قادینا ساری گئتدیم، ائله مؤحکم به‌له‌کده‌کی اوشاغی باغرینا باسمیشدی، اوشاغین بوغولماسیندان قورخدوم.  تب ائله‌میش اوشاغین اوزونو آچماق اوچون ألیمی‌اوزاتدیم. قادین هورکویوب قورخاراق دالا چکیلدی. آیاغی خییاوان قیراغینداکی جدولین قیرناسینا ده‌ییب سو کانالینا دوشدو. قورخودان دامارلاریمدا قانیم دوندو. زورنان اونا ساری گئتدیم. قونداق بیرآز اویانا دوشموشدو. قادین آجیلی بیر ناله ائتدی، گؤزلری گیزلی بیر یالواریشی گؤستریردی. قونداغین باشینی آچدیم، اوشاق هئی دئییردی: آنا! انا!
قولچاغین باشی قوپموشدو، ساریشین ساچلاری آرخین قیراغینداکی چامیرلی سویا باتمیشدی، آما ألده تیکیلمیش تیکیشلری اولان گؤزل رنگلی پالتاری هله ده یئنی و تر-تمیز گؤرونوردو.
اولا بیلسین بو نئچه گونون ایچینده تیکیلمیشدیر. قادین اوشاغینین نئچه‌مینینجی اؤلومونو گؤرمکله گؤزیاشلارینی اوزونه آخیتدی.