alirzaهاشیم عمی!
میانالی علیرضا

(سئویملی قوجامان شاعریمیز اوستاد‌هاشم ترلانا)

سسینه  یادیرغامیشام؛
اما کی اونودمامیشام.
سنسیز سنله اوتورموشام
هاشیم عمی‌!

ایتیب او گومراه ایللریم،
بال دادان شیرین دیللریم.
باغلیدی بوردا اللریم
هاشیم عمی‌!

قوری تاختایا دؤنموشم.
اؤز ایچیمه گؤمولموشم.
نه گؤردوم اوردا گؤرموشم
هاشیم عمی‌!

“کانادا”- دا قوری آددیر.
بوردا دوست یوخ،‌هامی‌یاددیر.
دوست سسینی منه چاتدیر
هاشیم عمی‌!

تکجه بیرجه اومیدیم وار؛
وطن، تورپاق منی آنلار.
قوی قیناسین قینایانلار
هاشیم عمی‌!

غربت اؤلومدی دئمیشلر.
والله پیس ده دئمه‌میشلر.
باش- آیاق‌دی بوردا ایشلر
هاشیم عمی‌!

یول وئرمه‌دیم من دوشمنه؛
نه ائتدی دوست ائتدی منه.
غریبه  گلمه‌سین  سنه
هاشیم عمی‌!

دوست‌دی، سیرداش‌دی اوردادی.
تکلیک، تکلنمک بوردادی.
سن ایسته‌ین دئه‌هاردادی
هاشیم عمی‌!

بوردا سیناق یئری یوخدی.
انگ اوینادان آما چوخدی.
غربت کی وار  پوخ‌دان پوخ‌دی
هاشیم عمی‌!

اینان منی ده یوردولار.
قورانلار چوخون قوردولار.
دئدیلر: قورددی، قورد  اولار
هاشیم عمی‌!

اولامیرام تکلی‌ییمی.
سئوسنده  کؤوره کلی‌ییمی،
سینامیسان  برکلی‌ییمی
هاشیم عمی‌!

سسینه  یادیرغامیشام.
سنسیز سنله اوتورموشام.
بیر آز داریخان اولموشام
هاشیم عمی‌!