اورتا آسیادان قول ـ قاناد آتیب
اوزو بئله ده گله‌رک
داغارجیغیندا قورودوغون نه‌دیر
اوغوز؟!
ـ منی قوخویان قورقودون دیلی.
یئر کوره‌سین دولاناراق
قوروموشام اؤزلویومو.
– سورگون ماهنی‌لارین قانادیندا
کوسولرین داشییان
نئچه مین یاشلی کیشی
بوغازیندا دویونله‌نن گؤی‌قورشاغی
اسه‌جک‌می بیر داها
آرازدان قیدالانان تورپاغین
کؤلگه‌سیز چاغیندا؟
ـ آچیلماسا بو دویون
قورخونج اولار قوش‌لارین قانادسیز دورومو،
خسته‌لیک یول آچار بیتگی‌لرین جانینا.
– مفتیل ـ مفتیل سرحدلنیر
سونبولو دنه دولدوران نازلامالارین.
قوزولار بول سود امه‌جک‌می بیرده
یادیرغامیش قویون‌لارین امجه‌ییندن
آنا؟!
ـ دوغودان باتی‌یا حؤکوم سوره‌ن ایگید
بو نه سورغو؟