غزل
مقصود تقی زاده هریس(نیسگیل)
ساری گونشلی، ایلیق دویغولو پاییز کیمی‌یم
بوراخ منی دلی عشقیم بیر آز آلیز کیمی‌یم
خیال ساچیم یئنه‌ده پیرتلاشیب دویون دوشموش
بوجاقلارا سیخیلان کندلی خیردا قیز کیمی‌یم
او سایریشان اومود اولدوزلاریم سؤنوب بیر- بیر
دومانلی یولدا قارانلیقدا لامپاسیز کیمی‌یم
سیزین تک آی ساری یارپاقلار، هر نه‌ییم ساری‌دیر
خزل- خزل آیاق آلتدا اوغولماغیز کیمی‌یم
هر آندا چیرپیلیرام تورپاغا، داشا، دووارا
پاییز گونو کوچه‌ده یئل قووان کاغیذ کیمی‌یم
باهار بویاقلی هارایلار بوغولدو سینه‌مده
خزان الی‌له قفیل باغلانان آغیز کیمی‌یم
منی ساعات کیمی بختیم چکیر دالی قاباغا
یامان گیجلله‌نیرم، یوخسا واختیمیز کیمی‌یم…
یک پاسخ
یاشاسین نیسگیل!