دؤنوش
قاسیم پناهی
یول‌لار آنجاق گئتمک اوچون دگیل!
دؤنمک ده بیر ائیلم‌دیر
دؤنمک،
قارانلیغین بوغازینا دوگونله‌نن قانلی ال‌لرینه باخمایاراق
ماهنی سؤیله‌مک
چیخمازلارا دیره‌نه‌رک گولمک
و تورپاغین کؤکسونو جیرماق‌لاییب قالخدیغین ال‌لرده
نئچه قاندال داها چوروتمک
قالابالیق بیر شهر دیر بورا
قارا بولودلاری قان شارابی یاغار
و تئلینه توخاندیغین هر ساز اؤلوم سیمفونیاسی چالار
اویسا سرخوشدور بورادا
ائولر،
دیوارلار،
آدام‌لار
بیر یاندا سکی‌لرده سئویشن گؤوده‌سیز کؤلگه‌لر
بیر یاندا اووِرکوت‌لارینین ساغ جیبینده قوتسال کیتاب
ال‌لرینده قافا تاسیندا شاراب گزدیرن قوش قووان‌لار
اؤلولر شهری دیر می بورا؟
قوش‌لار چوجوق‌لار اومودلار …
میلیون‌لارجا باخار گؤز ، کور
سونو موتلولوق
سونو یاشیل‌لیق اولان یول‌لار وار اؤنوموزده، بوش
یولچولار وار سینیق قاییق‌لاردا
ایکی ماوی آراسیندا آل قان _ قانچیر
دنیز دیدرگین ، آجیق‌لی
دالغالار سرسم
یول‌لار آنجاق گئتمک اوچون دگیل
دؤنمک بؤیوک بیر ائیلم
