بوغدولار سَسیمی
رقیه علیقلیان(لاله)
گنج‌کن چیچک‌لنیب بارا دولاندا،
قول- بوتاق بسله‌ییب قانادلاناندا،
سئوینیب اوره‌ییم عشقه دولاندا
بوغدولار سَسیمی، گور نفسیمی.
قوش کیمی قفسده یاندیم، باغیردیم،
قاپینی، دوواری دادا چاغیردیم؛
اوغولدو قول- بوتام، سولدوم، قاریدیم
بوغدولار سَسیمی گور نفسیمی.
من ندن سولموشام بیلن اولمادی،
گؤزومون یاشینی سیلن اولمادی،
الیمدن بیر توتان، گؤرن اولمادی
بوغدولار سَسیمی، گور نفسیمی.
یاشامدا تالاندیم، سولدو گوللریم،
قودرتدن توکندی یازار اللریم،
من ندن سولموشام بیلین ائللریم!
بوغدولار سَسیمی، گور نفسیمی.
بولبول تک اوخودوم دوستاقدا قالدیم،
ندن گون گؤرمدیم، سولدوم، سارالدیم؟
عؤمرومون بویوندا یاردیمسیز قالدیم
بوغدولار سَسیمی، گور نفسیمی.
دئدیلرکی قیزسان، سَسین حارامدی،
سَسیمه باغلاردا قوشلار اویاندی،
اوره‌گیم قان اولدو، قانا بویاندی
بوغدولار سَسیمی، گور نفسیمی.
