دویغو کؤرفزی

ع . ن . چاپار

کؤرفز، گؤزلریمیزده –

خیردا ببک لر کیمی‌،

خیردالاندی … ییغیندی !

کؤرفز ، گؤزلریمیزده –

ببک لر تک سیغیندی !..

ایچیمیزده ، دویغولار

گئنیش اولدو ، آچیلدی-

گونون   گون اورتاچاغی

بیر ماوی  کؤرفز  کیمی‌.

مین یئلکنلی

مین رنگلی

مین چلنگلی  قاییق لار ،

مین فیرتینا  قوپاردی!.

دویغولار کؤرفزینده –

آتیلمادی ساحیلدن  ایراغا دا قاییق لار.

گونون  توتوملوغوندا ،

دالغالارلا  اوز – اوزه  دایاندیلار قاییق لار-

اعتیناء  ائتمه دیلر  مایاغادا  قاییق لار ..

                   چیراغا دا  قاییق لار!..

کؤپوکلنمیش سولاردان ،

اوزوشدولر  یان – یانا.

دویغولار کؤرفزینین  اوجقاریندان اویانا –

یول آشدیلار  قاییق لار!،

دالغالارین ریتمینه  اویناشدیلار  قاییق لار.

دویغولار  کؤرفزینین ، ساحیل لری  دونیا می؟!

یا دونیانین ساحیلی ، دویغولار  کؤرفزیدی ؟!

آنجاق ، دونیا مالیدی

دویغولاردا ، دونیادا .

ازلدن  باسیلیبدیر –

بو ، ذیروه لی  بینادا .

دونیا  …

اونون  ذیروه سی ،

فیکیرلی دویغولارمیش ؟

دونیاسیز  بیر دئه  گؤروم ،

فیکیرمی‌ده  اولارمیش ؟!..

کؤرفز  گؤزلریمیزده ،

خیردا  ببک لر کیمی‌.

دویغولار  کؤرفزی ده –

گئنیشلیکده  قاباران ،

نهنگ  بیر پلنگ  کیمی‌–

مین رنگلی …

   مین  چلنگلی ! …

1366/09/01