او گؤزلر
سحر خیاوی

هئچ کیمسه بیلمه‌دی او آخشام
او قریب آخشام
قوناق گلدیم گؤزل گؤزلرینه
آچیلدی اوزومه ایچ ایچه سیررلی سئحیرلی قاپیلار
هر قاپی مین آچیلیش
هر قاپی مین گؤروش سن‌دن
دنیزلیگینده یویوندوم من
لاپدان نازل اولدو قلبیمه وحی کیمی‌شعر
کیمسه بیلمیر،
یارپاق- یارپاق پایلاشدیغیم شعرلر گؤزلرینین پایی‌دیر منه
یاندیردی یاخدی منی او قارانلیغیما ایشیق ساچان گونشلی گؤزلر
ایللردیر اینجه قانادلی کپنک‌لر اوچور….اوچور اوره‌ییمدن
کیمسه اینانماز من او گئجه ده گونش گؤردوم
من او آخشام گؤزلریندن اولدوز شرابی ایچدیم
آااااخ…. یاخالایین منی
قیفیل باغلایین دیلیمه
قانداللایین اللریمی
ذره‌بین الینده قاتیقدان توک چکن تنقیدچیلر
من شعرلریمی‌اونون جان آلان گؤزلریندن اوغورلاییرام!!!
هله دارا توشنده گیجه‌لک قافیه‌لریم
کیچیک آدینی چاغیریرام اونون
گولله‌نیر دوداقلاریم
چاغلاییر دویغو بولاغلاریمین گؤزو
جیغیر-جیغیر سیزیر داماریما قافیه‌لر
اوغرویام‌ من؛
ایلهام وئرن گؤزلرینین اوغروسو
ایللردیر یاساق کیتابلار کیمی
گیزلی-گیزلی دولاندیریرام اوره‌ییمن تکینده اونو
ایللردیر بیر یارا کیمی‌دوز سپیرم اوره‌ییمین اورتاسیندا اونو
بلکه لذّتلی گؤینه‌سین یارام
واااا…ی اگر سیزین ده پایینیز اولسایدی او گؤزلر
چیلغینجاسینا منی چؤللره سالیب
جانیمی‌الینه آلان او گؤزلر
هه….یادیمدادیر قدر آخشامیدی او گئجه
من ایللردیر اونون گؤزلرینین کیتابینی پیغمبرلشیرم!!!
من‌ همشه‌لیک بورجلویام او گؤزلره….