گؤروش
مقصود تقی‌زاده هریس (نیسگیل)

اوغلان گلدی
ایلک گؤروش یئرینه؛
ساچلاریندا ۲۰ قیش
اوزونده، آلنیندا ۲۰ قیریش،
اوره‌یی یارالی قوش
کیرپیک‌لرینین دالیندا
دارتینیر دنیز
آختاردی قیزی
قاریش با قاریش
ایز به ایز.
۲۰ آددیم گؤتوردو
قیزلا گؤروشدویو یئره
۲۰ یول بودره‌دی
۲۰ یول ییخیلدی.
اؤزونه
اوره‌ک – دیره‌ک وئره – وئره:
« بلکه اوردادیر
او پالچیق دووارین دیبینده
آغاجین کؤلگه‌سی آلتدا
کوچه‌نین تینینده!»
۲۰ اومید
۲۰ آرزی
۲۰ دیلک
جانلاندی اوره‌یینده…
دووار اوچموش،
آغاج قوروموش،
۲۰ خزل خیشیلدادی آیاغی آلتدا.
…….
۲۰ آددیم اویاندان
بیر قیز گلیر ۲۰ یاشیندا؛
بلکه اؤزودو!
۲۰ یول اوره‌یی آتیلدی دوشدو
او قیز یئتیشدی:
«عمی، نه گزیرسن
بیر کیمسه‌نین آردینجاسان؟»-
سؤیله‌یه‌رک
اونون بؤیروندن کئچدی
۲۰ آددیم اوزاقلاشدی…

تورپاق اوسته
۲۰ آیاق ایزی قالمیشدی
اوغلان
۲۰ ایل قوجالمیشدی ..!

۱۳۹۷/۴/۸ – هریس