دا بسدیر ماتم!- دئدیم
سوسن نواده رضی

 دا بسدیر ماتم!- دئدیم

گلین بایاتی اوخویاق بیرگه!

سوسدولار

باخیشلارینی ایلیشدیردیلر بیربیرلرینه

اوتانج رنگینده ایدی باخیشلاری

کؤنوللری لپه‌له‌نیردی گؤزلرینده

پیرپیزلانمیش ساچلاری

توپراق قوخویوردو

قان قوخویوردو

تَپره‌م قوخویوردو

هر آن سیلکله‌نه بیلر گینه- دئدیلر

بایاتی اوخودو بیری!

عالمی‌آدمی‌دئمیرم

آللاهین اؤزونو قان آغلادا بیله‌جک قدر آجیلی بیر آغی…

تویلاردا نه اوخورسوز؟- دئیه چیمخیردیم

و اوخوماغا باشلادیم:

“اوجا داغلار باشیندا جیران بالالار، جیران بالالار

جیرانین بالاسینی اووچو یارالار اووچو یارالار

آغاج اولایدیم یولدا دورایدیم

یار گلن یولا کؤلگه سالایدیم”

گولمک،

گولدورمک،

گولورموشسن کیمی‌داورانماق

او آندا

ان زور ایش

ان بؤیوک ثواب ساییلیردی

چپیک چالین!- دئدیم

چالدیلار مختصر

گولدولر مختصر

هئچ بو قدر گوجه‌نمه‌‌میشدیم گولمک اوچون

نه قدر ده چتین ایمیش

درد چکیرکن سئوینجلی گؤزوکمک…

آنجاق

قهرَباد باسمیشلیغیمی

گیزله‌ده بیلدیم

اؤلوشکه‌میش دوداقلارینا

بیر پای گولومسه‌ییش

قوندوردوم دا گلدیم…