قاراداغیم!
ائلدار موغانلی
زامان ترسینه دولاندی
کوله بوغولدو اوجاغیم؛
آلووسوز, توستوسوز یاندی-
ائلیم , اوبام, داشیم, داغیم,
قاراداغیم!
***
چالخالاندی غم دنیزی
طوفاندا قویدولار بیزی
بلا آلدی اوستوموزو
نه نیشانیم, نه مایاغیم,
قاراداغیم!
***
قوللو، قانادلی قیریلدیق
دیری- دیری باسدیریلدیق
بیز، آرخامیزدان وورولدوق
منیم ایگیدیم, قوچاغیم,
قاراداغیم!
***
ماتمینه گولن ده وار
اوره‌یی سؤکولن ده وار
سیناییرام دیار – دیار
کیمدی آرخام، کیم اورتاغیم,
قاراداغیم!
***
زامان یاتمادی یاتیما
غم النمیش حیاتیما
دومان چؤکوب بایاتیما
کدر یاغیر قوشمام، آغیم,
قاراداغیم!
***
“دیل‌غمی”نه قوربان اولوم
“کرمی”نه قوربان اولوم
المینه قوربان اولوم
منیم سؤز، صنعت اوجاغیم,
قاراداغیم !
***
اود دوشسه ده بینؤوره‌نه
داغ چکیلسه‌ده سینه‌نه
قالخاجاقسان یئنه، یئنه
آی منیم آنا تورپاغیم,
قاراداغیم!
قاراداغیم!
۲۳/۰۵/۹۱ – موغان
4 پاسخ
درین سالاملار ائلدار بی
سیزینله ایلک گوروشم ،تاسف کی چوخ گئج ال وئردی . شعیر دونیانیز چوخ ایستکلیدیر .
اللر وار
چوخ دویغولو و آغلایش لی
شعری اوخودوقجا غملر داها ارتیق گورونور یازان قلمین داها گوجلنسین
əllərini sixiram qardaşim sağol