بیز واریق
حسین خوجالی

اوجاغا گلمیشیک
اوجاغا یاشامیشیق
وطن کولوندن قانادلانان عنقا قوشلاری‌دیر بالالاریمیز
آیاغیمیز توپراغا، بیلک‌لریمیز شیمشک‌لره باغلی‌دیر
کؤز داشییریق کؤکسوموزده
سو داشییریق گؤزوموزده
آردی کسیلمه‌ین قیش فصیل‌لری‌نین قار چیچه‌یییک بیز
ال‌لریمیز چاتلاق-چاتلاق، زامان ایشچی‌سی‌ییک
قیزیل-قیزیل قیزاران اوجاق دمیری‌ییک
قارا یئل‌لرین آغ یازیسی‌ییق بیز
قارا بیرچک‌لرین آغ تئلی‌ییک
ننه‌لرین نیسگیلی‌ییک
توپراغین آغیز دادی
ایسلاق یئل‌لرده آلوو تپن ساوالان توپراغی‌ییق،
سهندیک
قوپ-قورو اورمونون باغیران بوغازی‌ییق
یازیق بیز،
یازدا آغاجیق
آغاجدا موچورلایان یاپراقلار
و قیشا قوشون چکن سیغیرچینلار، قارانقوشلار…
واریق بیز، بورداییق
آرازین چیگین‌لرینده ملک‌لر کیمی‌گوناه‌لاری- ثوابلاری یازیریق
بورداییق،
گؤروروک.