Home / شعر / نه یازیم قوجا تبریزه…؟! / عظیم غلامعلی‌پور (سحر)

نه یازیم قوجا تبریزه…؟! / عظیم غلامعلی‌پور (سحر)

نه یازیم قوجا تبریزه…؟!
عظیم غلامعلی‌پور (سحر)

کاش گله‌یدی باهار بیزه،
گؤره‌یدی چؤکموشم دیزه،
ساغیم دوزلاق، سولوم توزلاق
نه یازیم قوجا تبریزه …؟!

هانسی دیلده ….!
نه‌ییم قالیب…!؟
هانسی پاشام
به‌ییم قالیب…!؟
قورو بیر گولمه‌ییم قالیب..!
نه یازیم قوجا تبریزه….!؟

آراز آخیر…!؟
دولو دردیر…!
کؤرپوسو درد،
یولو دردیر…!
ساغی دردیر، سولو دردیر…!
نه یازیم قوجا تبریزه…

ساوالانین گؤزو آغلار،
بت – بره‌سی، دوزو آغلار،
اوره‌ک دولو سؤزو آغلار
نه یازیم قوجا تبریزه..!؟

«سحر»یم یاز، یازین باغری،
قاداقلی آوازین باغری،
آلوولودور سازین باغری
نه یازیم قوجا تبریزه…؟!

About ایشیق

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *