چئویرن: ایشیق
ترجمه: ایشیق
ایشیق

جولمه قایغو
علی تقی زاده لاریجان

آنام دانلایاردی هردن آتامی،
دئیردی: آی کیشی غصه‌نی اونود!
بئزدیریر سن چکن دردلر آدامی،
گل اؤز کؤچونو سور اؤزگه‌نی اونود!

سانجیسی جانینا دولوبدی یئنه،
دئییرسن آغیردی قارشیداکی قیش!
قونشو کندی دولو ووروب سنه نه؟!
سنین حؤکمون ایله یاغمیرکی یاغیش!!

جولمه قایغوسانمی نه سن آخی سن؟
نبی‌نین اؤکوزو اؤلوب کی اؤلوب!
باباش خسته‌لنیب بیر آی دئیه‌سن،
باغچادا چیچه‌یی سولوب کی سولوب!

بیرگون سوال وئردیم، آنام‌سا دئدی:
یازیق آتان کیمی داییم نیگران!
جولمه قایغو آدلی خایین بیریدی-
جومله یارانمیشین قئیدینه قالان!

جانین آلولارا، اودلارا آتار،
حیاتی دیدیکجه سرتدی, چتیندی!
ترسه یئل اسنده ماتمه باتار،
دئیر: نئچه آغاج سیناجاق ایندی!

ائله‌جه هم سفئه، همی خئیرخواه،
قریبه بیر اینسان ملگیم اولوب!
قایغوکشلیغینا چوخ چکمیشم آه،
آغیر عذابینا گؤزلریم دولوب!

اؤز عؤمرینین شیرین آنی بیلینمز،
سیزلار اؤزگه‌لر غمینه نی کیمی!
اوره‌ک قانی گؤزلریندن سیلینمز،
قارتالا دیدیلن پرومتی کیمی!

عؤموردن اوزولوب، سوزولوب ایللر،
آتام دا آنام دا تورپاغا گئدیب.
ساچیمی آغاردیب اؤتن فصیللر،
یاشیم اللی بئشه، آلتمیشا یئتیب.

خبرسیز الیمدن اوچان ایللرین
کیتابین آچیرام اؤنومه هرگون!
سون ایللر گؤرورم باخاندا درین،
ندنسه کدرسیز اؤتمه‌ییر بیرگون!

ایندی آتام کیمی من ده دئیه‌سن-
جولمه قایغو سایاق عومور سورورم!
آنجاق قایغوموزون کیفیتین من-
یامانجا فرقلی, باشقا گؤرورم!

آتامین چاغیندا اونو سارسیدان-
قونشونون قوهومون درد -الم‌یدی!
منیم باغریم‌ایسه اودی قارسیدان
یگانه حیاتلی یئرین غمی‌دی!

یازیق عالیملرین هارای سسینی-
عوام آنلامادی، باشچی سایمادی!
آنا طبیعتین یالوارماسینی –
فلک‌لر ائشیتدی، انسان دویمادی!

اوزون لایه‌سینی زده‌له‌میشیک،
داها قورویانمیر حیاتیمیزی.
اؤلومجول شعایا بویور دئمیشیک،
اودا سرطانلا سوپورور بیزی.

داها بولودلاردان یاغیش یئرینه –
هردن مئشه‌لره اسید چیله‌نیر.
اود وورور سپیلجک بیتگی‌لرینه،
داغلارا، داشلارا اؤلوم اله‌نیر.

ایل به ایل چوخالیر یئرین ایستیسی،
اریییر هر ایکی قوطبون بوزداغی.
شهرلرین آرتیر اییی, توستوسی،
ماسکادان دا گئچیر توزو، تورپاغی.

اوکیانلار آرامسیز بوشالمادادی،
یئم اولور جانلیسی بو آج انسانا.
حیاتیمیزیندا قالماییب دادی،
داها یئر کوره‌میز گلیبدی جانا.

ایکی له ایکینی دؤرت بیلمیر چوخی،
دئییر دندان وئرن نانین وئره‌جک.
نییه دوشونمه‌دیگ گؤره‌سن آخی،
سوفره‌میز نه سایدا آجی گؤره‌جک.

حسابسیز، کتابسیز ساییمیز آرتیر،
چاتیشماییر داها نه سو، نه چؤرک.
او کی بؤیره‌یینی چؤره‌یه ساتیر
زاواللی حیاتی نه‌یینه گرک؟

دئدیک بس نه قدر قیریب اودلاسان
طبیعت نه کوسر، نه‌ده اینجییر.
قولام خدمتینده سنین ای انسان
بوتون یارانمیشا آغاسان- دئیر.

بالیقلار ایل به ایل دوغوب تؤره‌سه
سولاردان پاییمیز اوزولمییه‌جک!
تورپاغا گوده‌نی بوللو ائله‌سک
تاخیل زوماریمیز کسیلمییه‌جک!

قیریلان بوداقلار وظیفه کیمی-
یئنی‌دن جوجه‌ریب بوی آتمالیدی.
سایسیز یاراسینین اولوب حکیمی،
بیز وووران یارانی ساغالتمالیدی.

بو سهو آنلامیلا سؤکوب تالادی-
آنا طبیعتین باغرینی انسان!
ایلیشدیگی اؤزو قازان چالادی
وئریر حیاتینی جهلینه قوربان!

یاخشی تانیمادیق نعمت‌لرینی،
قدرینی بیلمه‌دیک او گؤزللیگین!
اؤلچوب بیچنمه‌دیک دایاز، درینی
قیمتین دویمادیق علمین, بیلیگین!

بیز اؤز الیمیزله کئچمیشیک تورا،
یامان یوردوموزو قویدوق وئرانا!
کیم بیلیر نئچه مین ایللردن سورا-
بیرده بو یئرلرده حیات یارانا!

علمه، آنلاییشا باغلیدی هر شئی،
گؤرونور نه نه‌یین نتیجه‌سی‌دی.
منجه جولمه قایغو، یادا پرومئتی
انسانین ادراکی دوشونجه‌سی‌دی .

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

جولمه قایغو/ علی تقی زاده لاریجان

ایشیق
www.ishiq.net

آذربایجان ادبیات و اینجه‌صنعت سایتی

جولمه قایغو/ علی تقی زاده لاریجان

ایشیق
www.ishiq.net

آذربایجان ادبیات و اینجه‌صنعت سایتی

جولمه قایغو/ علی تقی زاده لاریجان

ایشیق
www.ishiq.net

آذربایجان ادبیات و اینجه‌صنعت سایتی