گیلانار باغی
رامین جهانگیرزاده

من چئخوفون «گیلانار باغی»نی سئویرم
گیلانار باغیندا گیلانار آغاجلاری
بیر – بیرلرینین قولاقلارینا پیچیلداشیرلار
پرده چکیلیر
او قاطارین آیاقلاری چولاقدیر
«لوپاخین» تانرییا بیر سؤز دئییر
تانری «آنیا»نین اوتاغیندا اسنه‌ییر
گیلانارلارین اوزو قیرمیزی‌دیر
من هئچ واخت اوزو قیرمیزی اولا بیلمه‌دیم
پرده جیریلیر
قیرمیزی ایشیق دوشور چئخوفون اوزونه
گیلانار باغیندا نه گزیر چئخوف؟!!
بونو میرزه‌دن سوروشدوم
حسن آغانین آدامی‌اولماسان
میرزه‌دن سوروشا بیلمزسن
حسن آغانین بیر نؤکری وار
گیلانار باغیندا خان اولوب
چئخوفو توتون دئییر
گیلانار باغینداکیلاری چیخاردین
بورا منیم خان ساراییم اولاجاق
گیلانار باغیندا بیر قبیر داشی وار
چارتلاییب داشی
او داشین چارتلاغیندان بیتیب بیر چیچک
او داشین آلتیندا بیر قاتیل اویویوب

چیچکلر قاتیللرین قانیندان قیدالانیرلار
سونونجو پرده
اوزاقلاردان بیر سس گلیر
بالتا سسی
گیلانار باغینین اورتاسیندان
صحنه‌یه گیریر الینده قانلی بیجاق اولان قاتیل
هامی‌چیچک آتیر باشینا
هامی‌چیچک آتیر باشینا