یالانچی !..
انصار قره‌داغلی
قوجا تاریخ گؤزلریندن گئچمیش، هئی!
قانادلاری قیریلان قوش اوچموش، هئی!
یول اؤز اسکی بوغچاسینی آچمیش، هئی!
آیاق – آیاق قوچاقلاردا یالانچی !…
نه خسته‌دیر قایالاردان گلن سس
قیسیر قالمیش ناغیللاری باسمیش پاس
اودو سؤنموش توستولرده یوخ نفس
دومان – دومان بو داغلاردا یالانچی !…
شیطان گیرمیش آذانلارین رنگینه
سحر اولسا بو آللاهلا جنگی نه ؟!
گؤز جامیندا ایشیق ساخلا سون گونه
قیبله قانلی چیراقلاردا یالانچی !…
یالانلارین آغ مایاسی کیتابدا
انسان اولان فیکیر – فیکیر عذابدا
درس – درس هر بیر مدرسه‌ده، مکتبده
الیف بویدا اوشاقلاردا یالانچی !…
آغ یالانا آلتون پالتار شعر – غزل
فیلیم‌لرین فوق آرتئستدی بو گؤزه‌ل!
حقیقتین بال مزه‌لی دیلی لال
اولدوز ایزلی آفاقلاردا یالانچی !…
باش عالیملر یالانلارین ازلی
بو دوروملا تانری درد – درد قوجالی
تکبیرلرین – کعبه‌لرین بیلالی
ناماز – ناماز دوداقلاردا یالانچی !…
یالانلاری ییغ- جم ائده‌ن ای ناشر
پئیغمبرلیق آی – گونشه یاراشیر
قدرت تاپا هر بیر انسان یول چاشیر
دریا یاپان بولاقلاردا یالانچی !…
«انصار» دردین کیمه قیلسین، حاکیم دئ!
ائل دئییر بس – او دردمند – حکیمدی!
باشیم داردا، نه یازیلسین حؤکم ایندی ؟
یاسالاردا – یاساقلاردا یالانچی !…
۹۵/۵/۵
