عشق اولسون!
اکبر رضایی

حیاتدا لب‌لری خندان اولان اینسانه عشق اولسون!
گولوب گولمک یاشاییش‌دیر، لبِ خندانه عشق اولسون!
صداقتدن تاپار یول، اوغرایار حقّه حقیقت‌لر
بو دینه، مسلکه، اینسانلیغا، ایمانه عشق اولسون!
حیاتین وارلیغی اینسانلیق ایله باش توتار هر آن
دوشونموش مئهریبان، سن سئوگیلی جانانه عشق اولسون!
من عاشقلر گؤزوندن باخمیشام دونیایه هر بیر آن
بو دونیادان او دونیایه بوجور پیمانه عشق اولسون!
منیم هر دردیمه درمان و چاره سئوگی‌دیر هر آن
جانیمدا باخ بو درده، سئوگییه، درمانه عشق اولسون!
یوخومدور باشقا بیر دردیم بو دونیادا، منیم دردیم-
محبّت‌دیر، محبّتله دولو اینسانه عشق اولسون!
حقیقت‌له صداقت باشقا بیر وارلیق‌دی دونیاده
بو وارلیقلار ایچینده، مکتب وجدانه عشق اولسون!
دَرین دردلر ییخانماز مرد اولان اینسانی هئچ بیر آن
دؤزومله، مردلیک‌له باغلانان، پئیمانه عشق اولسون!
فضولی‌لر، نسیمی‌لر یازیب عشقین مرامیندان
صداقتدن، ادب دن سؤز دیین دیوانه عشق اولسون!
زمانین دردی چوخدور، چوخ چوخ آرتیر گون به گون دردلر
چتینلیک قارشیسیندا مرد قالان اینسانه عشق اولسون!
حقیقت‌لر اگر بؤیله گلیب گئتمیشسه دونیادان
شرافتله دییردیم کی بئله آد سآنه عشق اولسون!
فدائی‌لر وئریب خالقیم بو توپراغدان صحاب اولدو
شهیدان رهِ حقّه و ستّارخانه عشق اولسون!
قارالمیش گونلرین رنگی، سارالدی سولدو بیر گول تک
منیم یوردوم و اؤلکم‌دیر، آذَربایجانه عشق اولسون!
وفاسیز دلبرین لعل لبیندن اوممادیم بوسه
منیم کؤنلوم قاپان یوردومداکی جئیرانه عشق اولسون!
هارای لار کؤنلومو بوغموش، دنیزلرجه منیم دردیم
صفاسیز گونلری ویران ائدن توفانه عشق اولسون!
منیم “سس سیز”لیغیم درددن‌هارای دان باش توتوب ای گول
یانیمدا دوز دوران یولداشلارا یارانه عشق اولسون!
۱۸/۱۰/۹۵