بو قادین
نیگار خیاوی

هاااای ی ی
منی سئون کیشیلر
دردیمدن اؤلن کیشیلر
قیرخ مین ایلدیر بو جنازه اوتاغیمین اورتاسیندا قورویور…
قیرخ مین ایلدیر آسلاق قالمیش،
قورخور قوخویور

یئندیرین اونو آشاغی
آشاغی یئندیرین
تاخین ویترینلره
تاخین ماتیک بویالی پاساژلارا
دامارینیزدا جسارتینیز وارسا

آیهاااای
منی سئون کیشیلر
دردیمدن اؤلن کیشیلر
قیرخ مین ایلدیر بو قادین
عطیر- آدکولون یئرینه
بنزین سَپیر اوستونه
و کیبریت چکیر اؤزونه

گؤتورون
گؤتورون بو یارالینی
کوْپییالاییب اوزونو یئکلدین!
سونرا بیر هئیکل دیکلدین ساعات قاباغیندا!

سؤزونوزده صداقتینیز،
دامارینیزدا جسارتینیز وارسا اگر…