قادین قیلیغینا گیرمیش…
معصوم جبارپور

قادین قیلیغینا گیرمیش بیر اؤلویم
هر گون
آینا قارشیسیندا
گؤزلریم رئمل‌لنیر
دوداقلاریم رژ تامسینیر
ساچلاریم گاهدان داغینیق
گاهدان سویلو بیر قادینام
دوزن وئره‌رم داغینیق ساچلارا
امما
گون به گون
آینا ،
بزکلی گؤزل قادینین
کیچیک گولومسه‌مه‌سینه حسرت قالیر
بیلیرسینیز می؟
گونلرین بیرینده
گولله‌لندی دوشونجه‌لری کیشی آدلی بیریسی ایله
او گون،
آتام تسبیح دنه‌لریله دانیشیردى تانرییلا
باشقا قادینلا سئویشمه‌سینی دوشونه‌رک
آنام یاشلی سون بئشیک قیزینا ار آختاریردی،
بیلیرسینیز می؟
دوشونجه‌نین سس‌سیزجه‌سینه قانا بویاندیغیندا
یالنیز
قونشو قیزی ایکینجی نامازین ایلک رکعتینده
آتئیست اولدو
ائرکک آدام بوتون کیتاب پارچالارین
کوچه میزده قاسیرغایا تاپیشیردی
او گئجه داراشیق کوچه‌میزده، دلی اولموشدو
ندن؟
بو گئجه ایت‌لرین سسی حوزونلو !

درین یوخو قادینی قاپسادی
یئنیدن یوخلوغونا اکلندی
ساکینجالی موتلولوق تیکرارلاندی
گئنیش بیر بوشلوق دولدو یاشامینا
آرخاسی اوسته دؤندو
بیر دامجی یاش سوزولوب بالینجینینی ایسلاتدی
دوداقلارینین شیریغیندان
یالنیز بوش یاتاقی دینله‌ییر
گئتمه_ قال سسینی!
اووواووواوووو
ترن اوزاقلاشیر
ائرکک ترنین کیچیک پنجره‌سیندن _
باخیر
باخیر
ایزلمک ده کیشی…
قیزجیغاز آغ جییارینین بوتؤولیکی ایله
ائرکه‌یین سیغاراسینین توستوسون چکیر ایچینه
باخیر
ترن قیشقیریر
بیربه بیر دمیر یولونو ترک ائدیر
ائرکه‌یین سون سؤزو _
سن منی سئونمزسن!

اوره‌یی پیچاقلانیر گونون گون اورتا چاغیندا

اووووااااووواووووو………

دیک آتیلیر
میزیلداییرلار یورغون ایتلر
اذان سسی گلیر
و کوچه‌نین ساغلاملیغی
قیزجیغازین آجی‌لاریلا سانجیلانیر
قورشونلاردان آلینجا دوشونجه‌می
انقلاب باش وئره‌جک تبریزده
سن_
خوشجا قال!