سوس!
نیگار خیاوی

«سوس، دیلینی ده توپور یئره!»
بیر تورانلیق آخشامدا
بؤیله دئدیلر منه!
اوتوروب دوشوندوم تک تک دیللریمی:
ـ ات دیلیم می؟
هه، آغزیمدا، یئرلی یئرینده
ساغ – سالامات
ـ آنا دیلیم می؟
شوکورلر، سانکی کؤهلن بیر آت
داشقین پتک… شیرینلییی قات قات
سوساجاغیم هئچ نه یوخ بورادا
اوووو… دیشی قوردام اولایاجاغام
سئل داشیب قولاق باتیراجاغام
البته !
تیخ تیخ توپورولجک ایره‌نجلر وار
اؤزو ده یئره دئییل،
اوزلرینه توپوره‌جه‌یم
سونرا منه سوس دئیه‌‌‌‌‌‌‌‌نلری
آیاغیم آلتیندان سوپور‌ه‌‌‌‌‌‌جه‌‌یم.