سازیم
رقیه علی قُلیان

یامان توتغوندور اوره‌گیم
«یانیق کرمی» چال سازیم!
قانلا قاتیقدیر چؤره‌گیم
اوره‌ک دردیمی‌آل سازیم!

سن سوسسان ظالیملر گولر
تارلام یانار، اود تؤکولر
بایقوش اوخور سیره‌م گئدر
دؤی «میصری»‌یه جان آل سازیم!

اورمانلاردا بایقوش اوخور
قاری دوشمن تورلار توخور
زامان بیزه اَیری باخیر
اوره‌ک غمینی آل سازیم!

یاد چالقیسی بیزیم دئییر
اَتی تؤکور، قانی یئییر
اُپرا، جاز نه‌لر دئییر
گل اونو سوسدور آی سازیم!

سن سوسسان کؤنلوم غم توتار
حایاتیمی‌ماتم توتار
عؤمور گولونو چَن توتار
یانیق کرمی‌چال سازیم!

ساری تئلیم ائللری گز
دوستو اوخشا دوشمنی اَز
شور‌هاوایلا دیللری گز
اوره‌ک‌لری آل آی سازیم!

کؤکلن جنگی ظالیملره
قان ایچنه، قان یئیه‌نه
بو ائللر گووه‌نیر سنه
گل بیر‌هارای سال آی سازیم!

سن دوواردان آسیلاندا
شور‌هاوالار کسیلنده
آلو قالخیر هر سینه‌ده
آی صدفلی تئللی سازیم!
آغیرـ آغیر ائللی سازیم!
۲۴/۱۰/۹۵