هله…
علیرضا میانالی

اللینی حاخلادی عؤمرون ایللری

عؤمور  میوه سینین  کالی وار هله.

یاشاماق  دئدی یین  عینی حیاتدی

زه هری  وار هله ، بالی  وار هله.

هله قارشیدادی ایللر، فصیللر

بئزیب لنگیسمده  بعضا  حیاتدا.

بیر کؤنول  دؤیه جک  دورمادان هله،

هله من عنواندا، هله من آد دا.

هله اؤتن عؤمرون گیرووندایام.

قارشیما چیخاسی خوش گونلر قالیر.

اودور  گؤزله‌مکدن  یورولمامیشام

هله اؤتن  گونلر همدمیم اولور.

بویلانیب باخیرام کئچمیشه بعضا

گؤر نه لر قالماییب، گؤر نه لر قالیب.

عؤمرون فیکیر یولو ده‌ییشیبسه ده

عؤمرون کؤنول  یولو  ده‌ییشمز اولوب.

آخی فیکیرکی وار، کؤچری قوش تک

هر ائلدن، اوبادان بیر ایستک تاپیب.

دی گل کؤنول کی وار،  او یورد یئرینده

بابالار قالایان اوجاقدان قوپوب.

بئله جه عؤمر ائدیب یاشامیشام من!

نیفرتده یاشیمدان قوجایام بیر آز.

دی گل محبتده اوشاق کیمییم

نئیله ییم  بونودا  گیزلتمک اولماز.

ائله اونا  گؤره دوشمنه دئییل،

یالانچی دوستا من چوخ آلدانمیشام.

دوشمندن آلدیغیم اوداردان دئییل

ساختا دوست سؤزوندن یارا آلمیشام.

ایندی نه دئیه سن اولوب کئچنه!؟

آخی اونودولمور او گئدیش- گلیش.

بؤیوک ایشلرده وار کئچمیشده ، آنجاق

بوگون عادی ایشدیر اؤتن عالی ایش.

اللینی حاخلادی عؤمرون ایللری.

عؤمور  میوه سینین  کالی وار هله.

یاشاماق دئدی یین عینی حیاتدیر،

زه هری وار هله، بالی وار هله.