محبت
احمد درگاهی

محبت یولچوسو اولوب اوره‌ییم
تانریدان وئریلن پای‌دی محبت!
گوندوزلر گونش‌دی یئر کوره‌سینده
قارانلیق گئجه‌ده آی‌دی محبت!

سئوگی‌لر گؤروشو، دویغو آنلاری
نَفَسه باغلانان جان‌دی محبت!
اوره‌ک دؤیونتوسو، سئوگی سئوینجی
داماردان آخیلان قان‌دی محبت!

گول چیچک آچیلار گؤروشلرینده
فصیللر باهاری یای دی محبت!
داغلارین دؤشونده سیزلایان بولاغ
چئشمه‌لر آخاری، چای دی محبت!

شاعیرلر اینجیسی، آشیق‌هاواسی
نغمه‌لر شیرینی سؤزدو محبت!
بیر ساغلام اینسانین گؤزه‌ل اندامی
وجودون شاهلیغی، گؤزدو محبت!

کوسوب باریشماغا بیر بئله زامان
عشوه‌دی، غمزه‌دی، ناز دی محبت!
اوماجاق اوموروق قارشیلیقلی بیز
دئمه کی سئوگیلیم آز دی محبت!

کؤکله‌ییب «درگاهی» ساری تئللری
عاشیق‌لار الینده ساز دی محبت!
دئمه‌یه بیر کلمه سؤزو قالمادی
اوره‌ییم دئیه‌نی یازدی محبت!