چئویرن: ایشیق
ترجمه: ایشیق
ایشیق

شعرلر / کریم قربانزاده

(۱)
دوروشوندان سئوگی یاغیر
یئریشیندن یاز
آ…ه سئودالیم
باس- باغرینا منی
و گیزلین باخیشینلا چیچکلندیر منی
کئفلندیر منی!

(۲)
یازدا یاغیش
قیش‌دا تونقال
قوربتده وطن
وطن‌ده سفر
ساواشدا باریش
و قارانلیقدا ایشیم- ایشیم ایشیلتی کیمی سئویرم سنی
من سکوتین ان درینلیگینده
ایکیجه سئوگی سؤزو کیمی سئویرم
سئویرم سنی .

(۳)
دنیز لرقورویار
قادینلارین گوز یاشلاری قوروماز
یارالی گونلرده
سئوداسیز وطنده .

(۴)
تبریزه یاغیش یاغیر من ایسلانیرام
تبریزه قاریاغیر من دونورام
آ…ه
گورسن هانسی حسرتدن آلوولانیرام!!

(۵)
باشقا هاوالارا آیاغیم گلمیر
یالنیز
سنین هاوانلا
اوره‌گیم گوپ -گوپ دؤیونمکده‌دیر.

(۶)
ایسلاق بولودلار دنیزه
جادار , جادار تورپاق یاغیشا
و من سنه باغلیام
سنه .

(۷)
گوروشوندن کئفلنیرم
زیر کئفلیلر کیمی
ائله بیل دونیانین ایچگی‌لرین ایچمیشم .

(۸)
سنی اود کیمی سئودیم
سئودامیزدان یاندیم
آلولاندیم
کوله دوندوم
کوله .

(۹)
گل
چیچک لری باغچالاردا
چیراقلاری تاقچالاردا
ایشقلاندیر
گونش اول ساریل منه
یاندیر
یاندیر
منی اودلاندیر .

(۱۰)
گونش داغلارین دالیندا
و دالغالار
ساحیلده ایتن کیمی
گوزلرینده ایتمک
و گوپ گوپ چیرپینان اورینده
بیتمک ایستیرم.

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

شعرلر / کریم قربانزاده

ایشیق
www.ishiq.net

آذربایجان ادبیات و اینجه‌صنعت سایتی

شعرلر / کریم قربانزاده

ایشیق
www.ishiq.net

آذربایجان ادبیات و اینجه‌صنعت سایتی

شعرلر / کریم قربانزاده

ایشیق
www.ishiq.net

آذربایجان ادبیات و اینجه‌صنعت سایتی