(۱) بو پنجره‌نین پرده‌سی
هئچ نه یازماق اولمور
سؤز ـ صؤحبتسیز ائوین
فاغیرلیغیندان.
بیر ال اوزانیب
گؤی اوزوندن
اولدوزلارین بیرین سیلدی.
بو پنجره‌نین پرده‌سی
بیلمیرم نه وقتدن بری
ییغیلماییب.
واز کئچ منیم
شعیر دفتریمدن
قولاق آس
استکانین سویوق چایینا.
(۲) آیاقلاریم، اوره‌ییم و من
باشماقلاریم یئریییر
من آمما قالمیشام
گئدیم، گئتمه‌ییم؟
تره‌زییه ده شوبهه‌لییم هله.
آداملار دالغا ـ دالغا
آیاقلاریم آداملار ایچینده
گؤزدن ایتیر.
هئچ دئیه‌سن
اوره‌ییم ده یئرینده دئییل.
باشیم قاریشیب حئساب ـ کیتابا
اوره‌ییم آیاقلاریما قوشولوب گئدیب.
(۳) گؤزه‌‌للیک قایناغی
هؤرومجه‌‌یین توروندان
قورشاق باغلامیش کپه‌‌نک
تانری‌‌نین گؤردویو یوخودور
حوری‌‌لر گز‌‌ن
اللی‌‌لیک تابلولار باغیندا.
گؤی قورشاغی قانداللانیب
هؤرومجه‌‌یین آغیز سویوندا
قیمته مینیب توخودوغو تور
بئزیکمیش انسان‌‌لار باغیشلاییب یعنی
زندانا عاید اولان هئیبتی.
2 پاسخ
حؤرمتلی تبریزلی جنابلاری
لطفا سایتیمیزدا اثرلری یاییلان شاعر و یازیچیلارین سیاهه‌سینه ال تاپماق اوچون «باشقا یازیچیلار» سؤزونون اوستونه تیکلایین. بورادا بوتون اثرلری یاییلانلارین آرشیوینه ال تاپا بیلرسینیز.
بوندان بیر نئچه آی اؤنجه ایلک صایفادا باشقا شاعیرلرین یآدلارین دا گؤرمک اولوردو آمما ایندی ساده جه بیر نئچه شاعیرین آدین گؤره بیلیریز عجبا بو دئیشیکلیگین سببی ندیر؟اؤنجه لری قاپساملی تورک شاعیر و یازارلارین آدلاری و یازدیخلاری اثرلرین گؤره بیلیردیک آمما ایندی سایتینیزداکی بو دئیشیکلیک بو ایمکانی بیزه وئرمیر عجبا ندن؟!جواب یازارسینیز ممنون اولورام.