susen
«فضولی»ایله دئییشمه
سوسن نواده‌رضی

فضولی:
حیرت ای بت صورتین گؤردوکده لال ائیلر منی
صورت حالیم گؤرن، صورت خیال ائیلر منی
مهر سالمازسان منه، رحم ائیله‌مزسن بونجا کیم
سایه تک سئودای زولفون پایمال ائیلر منی
رضی:
کؤنلونه اویسان، کؤنول، آشفته حال ائیلر سنی
صبرین اسکیلدر، دوچارِ قیل و قال ائیلر سنی
پایمال زولف-ی یار اولماق یاراشماز عاشیقه
سئوگی قوینوندا دورولماقلار زولال ائیلر سنی
فضولی:
ضعف طالع مانع توفیق اولور هر نئجه کیم
الطفاتین آرزومند وصـال ائیلر منی
من گدا سن شاهه یار اولماق یوخ ،اما نئیله‌ییم
آرزو ، سرگشته‌-ی فکر محال ائیلر منی
رضی:
آرزو جایزدی، اونسوز بیر قانادسیز قوش کیمی
قاینایان حیسلر، جوابسیز بیر سوال ائیلر سنی
پیشیگی خز گؤسترر سئومک، ساقین آلدانما کیم
گؤزلرین وابسته-‌ی حسن جمال ائیلر سنی
فضولی:
تیر غمزن آتما کی باغریم ده‌لر، قانیم تؤکر
عقد زولفون آچما کی آشفته حال ائیلر منی
دهر وقف ائتمیش منی نورس جاوانلار عشقینه
هر یئتن مهوش اسیر خط و خال ائیلر منی
رضی:
یار اداسی غمزه‌دیر، آشفته‌لیک ساچ قایداسی
سینه گرمک تیر-ی عشقه بی‌زوال ائیلر سنی
گؤز داغیتما هر یئره، پوزما حریمین سئوگینین
ایشتاهانین چوخلوغو بیل بدخصال ائیلر سنی
فضولی:
ای «فضولی» قیلمازام ترک طریق عشق کیم
بو فضیلـت داخل اهل کمال ائیلر منی
رضی:
ای طریق ِی عشقده پیری- مرادی «سوسن»ین
طبعینی رام ائیلمک صاحب جلال ائیلر سنی