masood azer
بولودلار
مسعود آذر

توپلانیب پامبیق کیمی
گؤی اوزره آغ بولودلار.
سانکی ییرغالانیبدیر
داغ اوسته داغ بولودلار.

دره‌لردن سورونور،
زیروه‌لرده گؤرونور،
گاهدان آلا بورونور،
دجل، قیوراق بولودلار.

قاناد چالیب، اوجالیر،
اوجالاردان اوج آلیر،
گونشدن ده باج آلیر،
یوکسک اوچاغ بولودلار.

گاه توتولوب قارالیر،
گاه سولور، گاه سارالیر،
شفق‌لردن بار آلیر،
گوللو یاناغ بولودلار.

قیسیر قالمایاجاقدیر،
برکت دوغاجاقدیر
ایلک باهارا مایاق‌دیر،
یازا اورتاق بولودلار.
۱/۵/۷۲