masoom
بیر گون…
معصوم جبارپور

بیر گون یالنیز بیر ایز قالاجاق مندن
گئجه‌لر یالقیزلیغیندا سیخ_
کیفسه‌میش خاطیره‌لری
اینسانی دوشونجه‌لری_
سناریو دوشلرییله دولودور
سونوم کیمسه بیلمه‌ین فیلیم کیمی‌اولاجاق،
دلی بیر پیلاژ
بوغولدوم مو
یوخسا انتحار هوسی دولدو قانیما!
یورقونام
یوپ یورقون
دالغالاردان قورتولموش بیر گمی‌کیمی
قارقاییرام سئودی‌ییم کیشینی
گئتمه‌یی دونیاما فاتیحه یایدی!
آغلاییر کورکلر
یئلکنلر
گؤیارته‌سی بئله
قاغایی‌لار
کاپیتانسیز گمی‌یه، دنیزه، للک‌لرین پای وئردی
بالیقچی‌لار
یاس ماهنیسینا دالیب
دنیزه یاش پایدیلر
سن
قادینلیغیمین قوراقلیغینا نه زامان گیردین
ایشیقلی گئجه‌ده گؤبه‌یمده تؤروم بسلنیردی
قیدیقلانیردیم سئوگیدن
ایچیمده بیر رئال سس پیچلداییردی
سن وطن ائلچیسی‌یدین
من اوره‌یی‌نین
پارادوکسا بیر سئوگی
سن دونیا ساواشیندان پبچیلداییردین
من غزل‌لرینه سؤیکه‌نیردیم
جانسیز یاشاییشین اورتاسیندا
چاپدیر دیکتاتورجاسینا دوداقلارینی
دریلریمده
تویناقلاری بنوشه اکه‌جک کؤکسومده بو گئجه
بیلیرسن می؟
جانسیز یاشاییشین اورتاسیندا
شعرلرین فاجیعه‌سیندن دویدوم!
چیمچه‌شیرم ایچی بوش قوتسالیقدان
بوی دئییر دونیانین بوتون پیسلیک‌لری
خیشیلدایان چیپلاق قزئتلرین صیفه‌لرینه سؤیکه‌نیرم
چارشابلی قادین تک_
یالنیز قارا تیترلره چاتیرام
گؤزللیک‌لر گؤزومه ساریلیر
داها یالان‌لاری ایچیمه سیغیشدیرانمیرام
بیر اوچوروم ایسته‌ییرم
قانادسیز اوچام
ایچیمدن اوزاقلارا!
بو ایل
باهار _
یوخا چیخیب بیزیم شه‌هرده
هئچ بیر چیچک _
پاییم اولمادی!
انسانین روحونو لکه‌له‌ییرلر
بو سس‌سیز گؤزه‌للیکلر_
هواداران سؤزلر.
بو گونلر
شرابیندا باهاناسی وار
ائتکیله‌میر
خراب ائتمه‌ییر
گئجه اولارکن
بیز ایکیمیز انکاز آلتیندا ازیلدیک
آنجاق من بیر یورقان آلتیندا_
راحات اؤله بیلرم!
آداملار آغیر بیر انکاز
قیسقانیردیلار ایپکسی ساچلاریما…
یام یاشیل گؤزلریمه….
قیب قیرمیزی دواقلاریما
… قیسقانیر‌هامی‌سنین اولدوغوم اوچون!
ساقین
گئتمه
هر یاشیل آلداتماسین سنی ،
هر یاشیل منیم گؤزلریم دئییل کی!
گان دا یاشیلدیر،
بیر باشقا شاعیر قادینین گوزلری یاشیل
پنجره ده کی کاکتوسون دا رنگی یاشیل!
***
یالقیزجا سؤزجوک‌لری دارا چکیرم
آلفابت آغلاییر گونلریمه
ایللرین سوروندوگوندا
بیر گون یالنیز بیر ایز قالاجاق مندن
گئجه لر یالقیزلیغیندا سیخ_
کیفسه میش خاطیره‌لری
آماندی
یاشیل تیکنلر اوره‌یینه تاخیلماسین !