یازیمسان منیم!
اکبر صالحی قاداش
نه گؤزل یاشیرسان شیرشیرالاردا
باهاریمسان منیم، یازیمسان منیم!
آری اوره‌یینده چیچک سئوگیسی
گؤی اوتا داراشان قوزومسان منیم!
بوداقلاردا گزه‌ن خاللی کپه‌نک
چیچک دوداغیندا آل-الوان لچک
چیملری دارایان اسین، یئل، کولک
روحومو اوخشایان سازیمسان منیم!
قویونون دؤشوندن سوزولن سود سن
بولوددا آلیشان اودسان، گوگورد سن
قوشدان جوجه‌سینه، جوک- جوک اؤیود سن
داغلاردان دنیزه ایزیمسن منیم!
سن یاشیل یارپاقسان قول- بوداقلارا
شیرین پیچیلتیسان او یارپاقلارا
یاییلان سوروسن اوجا داغلارا
ماراقلا گؤز آچان گؤزومسن منیم!
بولاقدان اووجوما چکدیییم سو سان
گؤللر اوزگونچوسو سوناسان، قو سان
“قاداش” ی ایسلادیب، یاغیشدا یوسان
آلنیمدا یازیلان یازیمسان منیم!
۱۳/۱/۱۳۹۵
یک پاسخ
موبارکدیر قاداش قارداش. سیزدن بیر داها بیر گؤزل شعر اوخودوق. یاشایین. حئیف دیر کی سیزین لطافتلی و آخار قلمینیز آخماسین.