«یانیق کرمی»نی چالما آماندیر!
رضوان جانای
اریدی قار کیمی یاندی کؤز اولدو
«یانیق کرمی»نی چالما آماندیر!
ناغیلا چئوریلدی آجی سؤز اولدو
«یانیق کرمی»نی چالما آماندیر!
کرم اوز عشقینده اود توتوب یانیر
هانسی ائل «اصلی»نین دردینی قانیر
بو یازیق قوپوزون دیلی باغلانیر
«یانیق کرمی»نی چالما آماندیر!
او گئجه «اصلی»نین اوره‌گی دوردو
اینانین آخ- وایی یوللاری یوردو
تکجه آی «اصلی»نین دردینی سوردو
«یانیق کرمی»نی چالما آماندیر!
دوگمه دوگمه اصلی باغلاندی داشا
اوره‌یی دولوبدور آز قالیر داشا
بو سئوگی بئله‌جه یئتمه‌سین باشا
«یانیق کرمی»نی چالما آماندیر!
قویمایین قوپوزون دوداغی یانسین
هارایلا بو کاروان داها دایانسین
«ارزروم» گدیگی بلکه اوتانسین
«یانیق کرمی»نی چالما آماندیر!
او گئجه آغ گلین یوللاندی یولا
اوزونو تاپشیردی تیکانلی کولا
سنه قوربان اولوم باخ دولا- دولا
«یانیق کرمی»نی چالما آماندیر!
اوره‌یی اسیردی او اوزون گئجه
کیمی وار قورتارسین، گئتمه‌سین نئجه؟
ایللردیر سئوگیسی وئریلب هئچه
«یانیق کرمی»نی چالما آماندیر!
آچیلدی دوگمه‌لر باغلاندی دیلی
باشلاندی کرمین آجی نیسگیلی
کول اولدو خونچاسی تالاندی ائلی
«یانیق کرمی»نی چالما آماندیر!
کدردن سوزو وار یاغیشلار سایی
ویصالدان پایی وار بیر اؤگئی پایی
نه چوخدور دونیادا «اصلی»نین تایی
«یانیق کرمی»نی چالما آماندیر!
5 پاسخ
ساغولون جانای خانیم آدام دویمور اوخوماقدان گوزله ییر شعرین قالانی گله یاشمالی سیز
یاشاسین رضوان جانای
یاشاسین رضوان جانای.
ساغ اولسون جانای اؤزونو قاینایان چاغلایان شاعیر
چوخ گؤزل آدام اوخودوقجا روحو یئریندن اویناییر یاشاسین دیه رلی شاعیریمیز جانای خانیم